Tres Sugerensia pa Mehorá Nos Manera di Siña Hende
1. Dikon nos mester trata di mehorá nos manera di siña hende?
1 Tur publikadó ta maestro pasobra nan ta kompartí informashon. Pues, sea ku nos ta prediká pa promé biaha na un kas, ta hasi un rebishita òf ta dirigí un estudio di Beibel, nos ta kompartiendo informashon, anto informashon masha importante. Nos ta splika hende “e skrituranan santu” ku por yuda nan bira “sabí pa salbashon.” (2 Tim. 3:15) Esaki sigur ta un gran privilegio! Pues, ban trata tres sugerensia pa mehorá nos manera di siña hende.
2. Kon nos por siña hende na un manera simpel?
2 Simpel: Ora nos ta bon familiarisá ku un tema, ta fásil pa lubidá kon difísil e informashon por ta pa un hende ku no sa di dje. P’esei, ora nos ta dirigí un estudio di Beibel, no agregá demasiado detaye na e informashon. Mas bien, resaltá e puntonan prinsipal. E echo ku un hende ta papia hopi, no ke men ku e ta duna mihó instrukshon. (Pro. 10:19) Por lo general, ta mihó pa lesa solamente e tekstonan klave. Despues ku bo kaba di lesa un teksto, enfoká solamente riba e parti ku tin di haber ku e tema ku bo ta tratando. Na Mateo kapítulo 5 te ku 7 nos por lesa e Sermon Riba Seru ku Hesus a duna. Ripará kon el a siña bèrdatnan profundo na un manera simpel i ku poko palabra.
3. Dikon ta bon pa nos usa ilustrashon, i kua ta esnan mas efikas?
3 Ilustrashon: Ilustrashon ta stimulá pensamentu, konmové sintimentu i yuda un hende keda kòrda. Un bon ilustrashon no mester ta un kuenta largu. Hesus a usa hopi biaha ilustrashon kòrtiku i fásil. (Mat. 7:3-5; 18:2-4) Ilustrashon ta referí tambe na plachi. Pues, dibuhonan simpel pintá riba un pida papel tambe por ta masha práktiko. Ku djis un tiki preparashon, nos por pensa riba ilustrashonnan ku ta efikas.
4. Kon nos por hasi bon uso di pregunta?
4 Pregunta: Pregunta ta obligá un studiante pa pensa. P’esei, tene pasenshi despues ku bo hasi un pregunta. Si nos mes bira kontestá, nos lo no sa kiko e studiante mes a komprondé. Si e kontesta ku el a duna no ta bon, ta mihó gui’é na e idea korekto pa medio di preguntanan adishonal en bes di djis korigié. (Mat. 17:24-27) Klaru ku niun di nos no ta maestro perfekto. P’esei, Beibel ta animá nos pa presta atenshon konstantemente na e siñansa ku nos ta duna. Esei lo trese benefisio eterno tantu pa nos komo pa esnan ku ta skucha nos.—1 Tim. 4:16.