Bo Por Hasi Mas den Bo Sirbishi?
1. Ki nesesidat urgente tin den e trabou di prediká, i dikon?
1 Ora ku Hesus a nota ku un gran kantidat di hende tabata interesá den e bon nobo di Reino, el a instruí su disipelnan pa “pidi e Señor di kosecha pa manda trahadó na su kosecha.” (Mat. 9:37, 38) Siendo ku, na moda di papia, nos ta bibando den e último oranan di e temporada di kosecha, nos trabou ta mas urgente ku nunka. Esaki ta nifiká ku nos mester hasi hopi orashon i wak si nos lo por hasi mas den sirbishi di vèlt.—Juan 14:13, 14.
2. Kon algun publikadó a reakshoná riba e yamada pa mas trahadó den sirbishi?
2 Kon pa Logra Hasi Mas den Sirbishi: Ku Yehova su guia i yudansa, hopi publikadó a logra kuminsá traha pionero. (Sal. 26:2, 3; Fil. 4:6) Algun publikadó a hasi un esfuerso spesial pa sirbi komo pionero ousiliar ún òf mas luna durante aña. Di e manera akí nan por a logra hasi mas den sirbishi. E goso ku nan a haña ora nan a traha pionero ousiliar a pone hopi di nan pensa riba e posibilidat di bira pionero regular.—Echo. 20:35.
3. Si bo a yega di traha pionero regular kaba, lo ta bon pa bo pensa riba kiko?
3 Bo Por Kuminsá Traha Pionero Atrobe?: Si bo a yega di traha pionero regular kaba, sin duda lo bo tin grato rekuerdo di e tempu ei. Bo a pensa seriamente kaba riba e posibilidat di kuminsá traha pionero atrobe? Loke a pone bo stòp di traha pionero kisas no ta stroba bo mas. Kisas e tempu a yega atrobe pa bo disfrutá di e privilegio spesial akí.—1 Juan 5:14, 15.
4. Ki oportunidat úniko nos tur tin?
4 E trabou di kosecha ta basta leu kaba i pronto lo e terminá. (Juan 4:35, 36) Laga kada un di nos analisá nos sirkunstansia pa mira si di un manera òf otro nos por hasi ahuste pa nos por partisipá mas den sirbishi di vèlt. I si realmente nos no por hasi mas den sirbishi, nos por hasi esfuerso pa bira mas efikas. (Mar. 12:41-44) Tur esnan ku por laga Yehova usa nan den e trabou úniko akí tin un gran privilegio nan dilanti!—Sal. 110:3.