Nos Ta Testigu Tur Ora Bai

1. Kiko nos por siña for di e relato enkuanto Hesus su testimonio na e muhé ku tabata n’e pos?

¹ Despues ku Hesus a kana oranan largu, e tabata kansá i yen di set. Miéntras ku su disipelnan a bai kumpra kuminda, el a kai sinta p’e sosegá na un pos pafó di un stat na Samaria. Hesus no a bai Samaria pa prediká. Mas bien, el a djis pasa dor di Samaria p’e bai Galilea, kaminda e lo a sigui ku su sirbishi. Apesar di esei, el a probechá di e oportunidat pa duna testimonio na un muhé ku tabata saka awa. (Juan 4:​5-⁠14) Dikon? Pasobra tur ora bai Hesus tabata e “testigu fiel i berdadero” di Yehova. (Rev. 3:⁠14) Si nos ke imitá Hesus, nos tambe mester ta Testigu di Yehova tur ora bai.​—⁠1 Ped. 2:⁠21.

2. Kon nos por prepará pa duna testimonio informal?

² Sea Prepará: Pa nos por ta prepará pa duna testimonio informal, nos mester tin literatura huntu ku nos. Hopi publikadó ta kana ku tratado i ta laga nan serka trahadónan den pakus, trahadónan di pòmp di gasolin i otro hende ku nan ta topa durante dia. (Ekl. 11:⁠6) Un ruman muhé ku frekuentemente ta biaha ta perkurá pa semper e tin un Beibel i un ehemplar di e buki Beibel Ta Siña den su tas, i e ta hasi esfuerso pa kuminsá un kòmbersashon ku e personanan ku sinta banda di dje.

3. Kon nos por kuminsá un kòmbersashon?

³ Kuminsá un Kòmbersashon: Ora di duna testimonio informal, nos no tin nodi di kuminsá mesora ku un tópiko di Beibel. Por ehèmpel, ora Hesus a inisiá un kòmbersashon ku e señora na e pos, e no a bira bis’é mesora ku e ta e Mesias. Simplemente el a pidié un poko awa pa bebe, i esei a lanta e muhé su kuriosidat. (Juan 4:​7-⁠9) Un ruman muhé a ripará ku usando un método similar, e por kuminsá un kòmbersashon ora hende puntr’é si el a disfrutá di un sierto dia di fiesta. En bes di kontestá ku e no ta selebrá e dia ei pasobra e ta Testigu di Yehova, e ta bisa: “Mi a disidí ku mi no ta partisipá den e selebrashon ei.” Por lo general, e persona su kuriosidat ta pon’é puntra kiko ta e motibu i, e ora ei, e ruman ta haña oportunidat di duna testimonio.

4. Dikon Mateo 28:​18-⁠20 ta un motivashon pa bo?

⁴ Ounke Hesus a kaba ku su sirbishi ku el a efektuá ku entusiasmo riba tera, ainda e ta masha interesá pa e predikashon tuma lugá manera e a hasié. (Mat. 28:​18-⁠20) P’esei, meskos ku nos Ehèmpel Hesus, nos ta Testigunan ku tur ora ta kla pa hasi deklarashon públiko di nos fe.​—⁠Heb. 10:⁠23, NW.