“No Tene Miedu”
1. Meskos ku Jeremias, ki desafionan nos lo por enfrentá?
1 Ora ku Dios a asigná Jeremias komo profeta, el a sinti ku e no tabata kapasitá pa e asignashon. Pero Yehova a sigur’é, “no tene miedu,” i bondadosamente el a fortalesé Jeremias pa kumpli ku su asignashon. (Jer. 1:6-10) Awe tambe, timides òf falta di konfiansa por afektá nos partisipashon den sirbishi. Miedu di e manera ku hende por reakshoná òf di kiko nan ta pensa di nos tin bes por stroba nos di duna testimonio. Kon nos por vense e temornan ei, i ki bendishon nos lo por haña komo resultado?
2. Si nos prepará pa nos ministerio, kon esei por yuda kita nos miedu?
2 Prepará di Antemano: Hopi bes bon preparashon por yuda kita nos miedu. Por ehèmpel, si nos repasá di antemano opheshonnan ku doñonan di kas por bin kuné, nos lo ta mihó prepará pa trata ku nan. (Pro. 15:28) Durante nos Adorashon Komo Famia lo ta bon pa train kon pa vense diferente desafio na skol i den nos ministerio.—1 Ped. 3:15.
3. Kon konfiansa den Yehova ta yuda nos vense miedu?
3 Konfia den Yehova: Konfiansa den Dios lo yuda nos vense miedu. Yehova a sigurá nos ku lo e yuda nos. (Isa. 41:10-13) No tin un mihó siguransa ku esei. Ademas, Hesus a sigurá nos ku asta si nos haña nos ku un situashon inesperá, Dios su spiritu santu lo yuda nos duna un bon testimonio. (Mar. 13:11) P’esei ta bon pa nos pidi Yehova regularmente den orashon pa duna nos su spiritu santu.—Luk. 11:13.
4. Ki bendishon nos lo haña si nos perseverá den nos ministerio apesar di desafio?
4 Bendishon: Segun ku nos ta perseverá den nos ministerio apesar di desafio, nos ta haña fortalesa pa enfrentá pruebanan ku presentá den futuro ku éksito. Nos ta haña kurashi, un karakterístika di esnan ku tin Dios su spiritu santu. (Echo. 4:31) Ademas, segun ku nos ta vense nos miedu ku Yehova su yudansa, nos ta fortalesé nos fe i nos ta haña mas konfiansa den su poder di salba. (Isa. 33:2) Tambe nos ta sinti goso i satisfakshon pasobra nos sa ku nos ta agradá nos Tata selestial. (1 Ped. 4:13, 14) P’esei, laga nos no tene miedu di deklará e mensahe di Reino ku kurashi, i konfia semper ku Yehova lo yuda nos!