Mustra “Kompashon”

1. Ki nesesidat hopi hende tin awe?

¹ Nunka promé den historia hende tabatin un nesesidat asina grandi pa haña yudansa i kompashon. E situashon mundial ku ta deteriorando ta pone ku hende ta sinti nan infelis, deprimí i sin speransa. Miónes di hende mester di yudansa, i komo kristiannan nos ta den e mihó posishon pa demostrá berdadero interes pa nos próhimo. (Mat. 22:⁠39; Gal. 6:⁠10) Kon nos por demostrá e interes ei?

2. Kua ta e mihó manera ku nos por mustra kompashon?

² Un Obra di Kompashon: Ta Dios so por duna hende berdadero konsuelo ku ta dura pa semper. (2 Kor. 1:​3, 4) Yehova ta un Dios sumamente kompasivo, i p’esei e ta urgi nos pa nos tambe mustra kompashon. Nos por hasi esei ora nos ta kompartí e bon notisia di Reino ku nos próhimo. (1 Ped. 3:⁠8) E mihó manera pa nos konsolá “hende di kurason kibrá” ta di partisipá aktivamente den e trabou akí, ya ku e Reino di Dios ta e úniko speransa berdadero pa hende ku ta sufri. (Isa. 61:⁠1) Debí ku Yehova ta sinti kompashon pa su pueblo, pronto lo e kaba ku tur maldat i establesé un hustu mundu nobo.​—⁠2 Ped. 3:⁠13.

3. Kon nos por demostrá ku nos ta mira hende manera Hesus ta mira nan?

³ Mira Hende Manera Hesus A Mira Nan: Ora Hesus tabata prediká na un multitut di hende e no a mira nan simplemente komo un grupo di hende sino komo personanan individual. El a mira ku kada un di nan tabatin mester di yudansa pa kultivá un bon relashon ku Dios. Nan tabata manera karné sin wardadó. Ora Hesus a mira nan, el a sinti kompashon pa nan i esei a motiv’é pa siña nan ku pasenshi. (Mar. 6:⁠34) Ora nos ta mira hende manera Hesus ta mira nan, nos tambe lo mustra berdadero kompashon. Esaki lo ta bisto den nos manera di papia i nos ekspreshon di kara. Nos lo hasi e trabou di prediká nos prioridat i adaptá nos presentashon na e nesesidat di kada hende.​—⁠1 Kor. 9:​19-⁠23.

4. Dikon nos mester sigui mustra kompashon?

⁴ Un multitut grandi di hende den tur nashon ta reakshonando faborablemente na e mensahe di Reino i na e interes ku nos ta mustra den nan. Segun ku nos ta sigui mustra kompashon, nos lo onra i agradá Yehova, nos Dios di kompashon.​—⁠Kol. 3:⁠12.