Semper Kla pa Prediká
1. Kon nos por sa ku predikadónan di promé siglo semper tabata kla pa prediká?
1 Den promé siglo predikadónan zeloso a deklará e bon notisia “sin stòp” tur kaminda ku nan a haña hende. (Echo. 5:42) Pues nos no por imaginá ku nan lo a keda sin prediká na esnan ku nan a topa riba kaya segun ku nan tabata bai di kas pa kas. Òf ku nan lo no a probechá di oportunidat pa duna testimonio informal miéntras nan tabata hasi kompra den plasa despues di sirbishi. Meskos ku Hesus, semper nan tabata kla pa prediká.—Mar. 6:31-34.
2. Kiko ser un Testigu di Yehova ta enserá?
2 Semper Kla: E nòmber, Testigunan di Yehova, no ta djis deskribí loke nos ta hasi, sino mas bien, ken nos ta. (Isa. 43:10-12) P’esei, komo Testigu, semper nos ta kla pa defendé nos speransa asta ora nos no ta traha di kas pa kas. (1 Ped. 3:15) Bo sa pensa delantá riba situashonnan ku por presentá pa duna testimonio informal? Bo ta perkurá di tin literatura huntu ku bo pa ofresé hende interesá? (Pro. 21:5) Bo ta traha solamente di kas di kas, òf si sirkunstansia permití bo ta prediká tambe na otro sitio?
3. Dikon no mester konsiderá predikashon den kaya, lugá di parker, parke i negoshi komo di ménos importansia?
3 Prediká “Públikamente”: Otro sitio kaminda nos sa prediká ta den kaya, lugá di parker, parke, negoshi, etcetera. Mester mira nan komo djis un opshon? Apòstel Pablo a bisa ku el a prediká “públikamente” i di kas pa kas. (Echo. 20:20) Sirbishi di kas pa kas ta keda e manera prinsipal i mas efektivo pa alkansá hende ku e mensahe di Reino. Sinembargo, predikadónan di promé siglo a konsentrá riba hende, no kas. Nan a probechá di tur oportunidat pa papia tokante e bèrdat públikamente, informalmente i di kas pa kas. Ta bon pa nos tambe tin e mesun aktitut pa asina nos kumpli ku nos sirbishi kabalmente.—2 Tim. 4:5.