Duna Testimonio di Kas pa Kas
1 “Esnan ku tin eksperensia den plama e Bèrdat den diferente forma lo ta di akuerdo ku e kampaña di kas pa kas ku e [publikashon] OURORA DI MILENIO ta e forma mas efikas den e tempu aki pa prediká e Bèrdat.” E deklarashon ei den e revista Zion’s Watch Tower di 1 di yüli 1893 a enfatisá e balor di e ministerio di kas pa kas. Rònt mundu hende ta mir’é komo un karakterístika distintivo di Testigunan di Yehova. Pero siendo ku den algun pais ta birando mas difísil pa haña hende na kas, e método aki ta efikas ainda?
2 Bíbliko i Importante: E trabou di duna testimonio di kas pa kas tin un base bíbliko. Hesus a instruí 70 disipel pa nan bai dos-dos na kas di e hendenan. (Luk. 10:5-7) Djis despues di Hesus su morto, Beibel ta bisa di su disipelnan: “Tur dia, den tèmpel i di kas pa kas, nan tabata sigui siña hende” e bon nobo. (Echo. 5:42) Apòstel Pablo tambe a siña hende di kas pa kas ku entusiasmo.—Echo. 20:20.
3 Te ainda e trabou di prediká di kas pa kas ta un método importante pa plama e bon nobo. E ta permití nos “buska pa haña” personanan meresedor den un manera sistemátiko i organisá. (Mat. 10:11) Por lo general, hende ta mas relahá ora nan ta na kas. Ora nos papia ku nan personalmente—tende nan stèm, mira nan ekspreshon di kara i opservá loke tin rònt di nan—nos por komprondé kiko ta nan interes- i preokupashonnan. E sistema aki sa duna nos e mihó oportunidat pa kòmbersá mas tantu tempu.
4 Hasi Ahustenan Personal: Apòstel Pablo tabata dispuesto pa hasi ahustenan personal “pa kousa di [e] evangelio.” (1 Kor. 9:23) Kisas nos por adaptá nos programa pa nos por prediká ora nos tin chèns di haña mas hende na kas, manera atardi lat, durante fin di siman òf riba dianan di fiesta. Hasi un anotashon di e kasnan kaminda no tin hende, i purba haña nan atrobe riba un otro dia di siman òf un otro ora di dia.
5 Asta publikadónan ku tin problema ku salú lo por partisipá den e trabou di prediká di kas pa kas. Podisé nos por plania pa bai ku e personanan aki na kasnan ku ta fásil pa alkansá i asina permití nan traha manera nan por. Un ruman muhé ku tin problema ku rosea kòrtiku por a traha un kas so kada mei ora. Sin embargo, e tabata sintié masha felis i satisfecho ora ku e por a traha huntu ku e grupo!
6 Nos ta sigui haña hende ku kualidatnan di karné den e trabou di kas pa kas. Un publikadó a bati na porta di un kas, i e doño di kas a bis’é: “Drenta. Mi sa ken bo ta. Mi tabata hasi orashon pa Dios manda un hende pa yuda mi, i despues mi a tende batimentu na porta. El a tende mi i a manda bo.” E resultadonan ta duna evidensia ku Yehova ta bendishonando e método aki di prediká. (Mat. 11:19) Sea determiná pa partisipá regularmente den e trabou di duna testimonio di kas pa kas.
[Study Questions]
1. Ki pregunta ta lanta en konekshon ku e ministerio di kas pa kas i dikon?
2. Kiko ta e base bíbliko pa e trabou di prediká di kas pa kas?
3. Kua ta algun bentaha di e trabou di prediká di kas pa kas?
4. Kon nos por hasi e trabou di prediká di kas pa kas mas produktivo?
5. Kon nos por yuda publikadónan ku tin problema ku salú traha den e trabou di kas pa kas?
6. Dikon nos mester partisipá regularmente den e trabou di duna testimonio di kas pa kas?