Abo Por Sali den Sirbishi Parti Atardi?
1. Segun un buki, ki ora apòstel Pablo tabata prediká di kas pa kas?
1 Segun e buki Daily Life in Bible Times, apòstel Pablo tabatin kustumber di prediká di kas pa kas “for di 4 or di atardi te anochi lat.” Nos no sa si esei en bèrdat tabata e kaso, ma loke sí nos sa ta ku Pablo tabata dispuesto pa “hasi tur kos pa kousa di e bon notisia.” (1 Kor. 9:19-23) Lo el a hinka su kosnan den otro di manera ku e por a prediká ora ku mayoria di hende tabata na kas.
2. Dikon ta bon pa sali den sirbishi parti atardi?
2 Hopi kaminda nos rumannan tin kustumber di prediká di kas pa kas den siman parti mainta. Pero, esei ta e mihó momento di dia pa haña hende na kas? Un pionero a bisa: “Apénas bo ta haña hende na kas parti mainta. Mayoria di hende ta na kas mas atardi.” Den oranan di atardi hende sa ta mas relahá i dispuesto pa kòmbersá. I nos tin mas chèns di haña foral hende hòmber pa papia kuné tokante e bon notisia. Pues, si e ansianonan ta haña ku ta bon, nan mester organisá reunionnan pa sali den sirbishi parti atardi tambe.
3. Kon nos por ta prudente ora nos ta prediká atardi lat?
3 Sea Prudente: Ora nos ta sali den sirbishi parti atardi, ta importante pa nos ta prudente. Por ehèmpel, si bo yama na un kas na un mal momento, kisas nèt ora e hendenan ta komiendo, ta mihó bisa nan ku lo bo bolbe mas despues. Si kuminsá bira skur, para kaminda e doño di kas por mira bo i bisa mesora ken bo ta i e motibu di bo bishita. Lo ta bon tambe pa traha dos dos òf serka di e grupo i keda den kayanan ku tin bon iluminashon i ku no ta isolá. Di otro banda, evitá di yama muchu lat. (2 Kor. 6:3) Si sierto bario ta bira peligroso ora solo baha, ta mihó pa traha nan promé ku bira sukuritu.—Pro. 22:3.
4. Ki bendishon e sirbishi parti atardi ta duna nos?
4 Ki Bendishon Nos Ta Haña? Nos lo disfrutá muchu mas di nos sirbishi ora nos haña hende pa papia kuné. I mas hende nos haña, mas oportunidat nos tin pa yuda nan ‘haña salbashon i yega na un konosementu eksakto di e bèrdat.’ (1 Tim. 2:3, 4) Abo por ahustá bo programa pa sali den sirbishi parti atardi?