Bo A Purba Testificacion Djanochi?

¹ Nos tur ta haña placer den ser productivo den nos trabou. Na otro un banda, ora nos no por mira resultadonan positivo, e trabou por bira laf i insatisfaciente. Labor significativo ta personalmente recompensador, i e ta un bendicion. (Compará cu Eclesiástes 3:​10-13.) Nos por aplicá e principio aki na nos trabou di predicá. Nos sa di experencia cu ora nos bai di cas pa cas i por combersá cu hende tocante e Bijbel, nos ta regresá cas spiritualmente refrescá. Nos ta sinti cu nos realmente a logra algu.

² Den algun área a bira masha difícil pa haña hende na cas durante cierto oranan di dia. Informenan ta indicá cu den hopi lugá mas cu 50 porciento dje hendenan no ta na cas ora nos pasa trempan den dia. Hopi congregacion a atendé e problema aki dor di haci areglo pa testificacion djanochi, i nan a haña bon éxito. Publicadornan ta informá cu ora nan pasa mas lat den dia, tin mas hende na cas, i en general, hende ta mas relahá i mas incliná na scucha n’e mensahe di Reino. Bo a purba testificacion djanochi den bo teritorio?​—⁠Compará cu Marco 1:​32-34.

³ Ancianonan Ta Organisá Testificacion Djanochi: Den algun área reunionnan pa sirbishi di veld tené atardi lat of anochi trempan tabatin bon apoyo. Por duna consideracion na publicadornan hóben cu no tin scol atardi i na adultonan cu a caba cu nan trabou seglar mas lat den dia. Algun publicador cu no por sali den sirbishi di veld den fin di siman ta haña cu testificacion djanochi durante siman ta un manera práctico pa nan tin un participacion regular den e trabou di predicá.

⁴ Tin vários actividad cu bo por participá aden durante testificacion djanochi. Bo por duna testimonio di cas pa cas cu revista of usa e oferta di literatura p’e luna. Anochi ta un bon ora pa bishitá hendenan cu no tabata na cas ora publicadornan a pasa mas trempan den dia of den fin di siman. Tambe lo por tin teritorio productivo pa testificacion riba caya, cu ta permití bo topa hende cu ta biniendo cas for di trabou. Hopi publicador ta haña cu anochi ta e mihó ora pa haci rebishita cerca esnan cu a mustra interes.

⁵ Sea Cauteloso i Discreto: Den cierto áreanan por ta peligroso pa sali ora ta birando scur of despues cu bira scur. Lo ta sabí pa cana dos-dos of na grupo den cayanan bon-iluminá i bishitá casnan of edificionan di apartamento solamente caminda bo ta basta sigur di cu lo bo ta a salbo. Ora bo bati na un porta, para caminda nan por mirá bo, i identificá bo mes claramente. Mustra dicernimentu. Si bo ripará cu bo a yama na un momento inoportuno, manera ora e famia ta comiendo, ofrecé pa pasa bek na un otro ora. Generalmente ta mihó pa limitá bo testificacion n’e oranan trempan di anochi, mas bien cu haci bishitanan lat, ora cu doñonan di cas por ta preparando pa bai drumi.

⁶ Anochinan den luna di juli i augustus cu tin mas ora di claridad ta particularmente apropiado pa testificacion djanochi. Segun cu nos ta rindi Dios “sirbishi sagrado di dia i anochi,” Jehova siguramente lo bendicioná nos esfuersonan.​—⁠Rev. 7:⁠15.