Bo Por Adaptá Bo Programa?
1 Komo kristiannan berdadero, nos a aseptá e invitashon pa bira “piskadó di hende.” (Mat. 4:19) Meskos ku piskadó literal, nos tin mas chèns di logra mihó resultado den e trabou di piska hende si nos programá tempu pa prediká ora nos por haña hende na kas. Den e lunanan binidero den hopi pais ta bai bira skur mas lat. Atardi lat promé ku bira skur lo tin mas hende na kas. Hopi bes nan ta mas relahá i kisas mas inkliná pa risibí bishita. Bo por adaptá bo programa pa bo prediká durante e oranan ei?—1 Kor. 9:23.
2 Predikashon Anochi: Dor di plania di antemano pa prediká durante e oranan trempan di anochi nos lo por alkansá mas hende ku e bon nobo. (Pro. 21:5) Podisé e hóbennan por prediká despues di skol. Otronan kisas por hasi esei despues di trabou. Algun grupo di estudio di buki lo por hasi areglo pa prediká un ora promé ku e estudio semanal.
3 E trabou di prediká di kas pa kas atardi lat i durante e promé oranan di anochi por duna nos oportunidat pa kòmbersá ku hende ku normalmente no sa ta na kas. Den hopi teritorio ta posibel tambe pa duna testimonio riba kaya i den otro formanan públiko durante e promé oranan di anochi. I hopi publikadó ta haña ku anochi ta e mihó tempu pa hasi rebishita i kuminsá estudio di Beibel.
4 Usa Disernimentu: Nos mester usa sano huisio ora di prediká anochi. Por lo general ta mihó pa nos duna testimonio solamente durante e oranan trempan di anochi, i no yama na kas di hende ora nan ta serka di bai drumi. (Fil. 4:5, NW) Ora bo ta yama na un porta, para kaminda e doño di kas por wak bo, i identifiká bo mes klaramente. Bisa mesora kiko ta e propósito di bo bishita. Si bo a yama na un ora inoportuno, manera ora e famia ta komiendo, ofresé pa pasa un otro ora. Semper, mustra konsiderashon.—Mat. 7:12.
5 Nos mester tene kuenta tambe ku e posibel peligernan. Si bo ta prediká ora a bira skur kaba, ta sabí pa bai komo pareha òf den grupo. Keda den kayanan ku tin bon iluminashon kaminda bo no ta keda isolá. Duna testimonio solamente na lugánan kaminda bo ta sinti bo safe. Evitá áreanan ku podisé no ta safe ora ku bira skur.—Pro. 22:3.
6 E trabou di prediká parti atardi lat i trempan anochi ta duna nos oportunidat pa traha den sirbishi ku e pioneronan ousiliar i regular. (Rom. 1:12) Bo por adaptá bo programa pa bo partisipá den e rasgo di sirbishi aki?
[Study Questions]
1. Pakiko nos mester adaptá nos programa pa prediká?
2. Menshoná algun manera ku nos por alkansá mas hende ku e bon nobo.
3. Den ki maneranan bo por prediká durante e oranan lat di atardi i promé ku bira skur den bo teritorio?
4. Dikon ta importante pa nos mustra disernimentu i konsiderashon ora nos ta prediká anochi?
5. Kon nos por evitá e posibel peligernan ora nos ta prediká?
6. Ki benefisio adishonal e trabou di prediká atardi lat i trempan anochi ta trese kuné?