Usa Nos Tempu Bon den Sirbishi
Durante e aña di sirbishi 2014, Testigunan di Yehova a dediká 1.945.487.604 ora na e trabou di prediká i di hasi disipel. Esei sin duda ta demostrá ku nos ta determiná pa keda aktivo den nos sirbishi na Yehova. (Sal. 110:3; 1 Kor. 15:58) I komo ku “no a sobra muchu tempu mas,” lo ta bon pa usa nos balioso tempu den sirbishi pa papia ku mas tantu hende posibel.—1 Kor. 7:29.
Pa usa nos tempu bon den sirbishi, nos mester ta fleksibel. Por ehèmpel, por sosodé ku regularmente nos ta pasa un òf mas ora den un rasgo di sirbishi sin haña hende pa papia kuné. Nos por hasi ahuste pa haña mas hende pa papia kuné? Sirkunstansianan ta varia di un lugá pa otro. Sinembargo, e siguiente sugerensianan por yuda nos usa nos tempu bon pa asina evitá ku nos ta “dal den bashí.”—1 Kor. 9:26.
Prediká di Kas pa Kas: Pa hopi aña, publikadónan tin e kustumber di kuminsá nan dia di sirbishi predikando di kas pa kas. Sinembargo, hopi hende ta traha durante dia. P’esei, dikon no purba di prediká di kas pa kas mas atardi òf promé ku bira sukú? Den e oranan ei tin mas hende na kas i nan ta ménos okupá. Di otro banda, prediká durante dia riba kaya òf na negoshi ta duna mihó resultado.
Prediká na Lugánan Públiko: Nos mester pone e mesa- i stèntnan portátil na un sitio kaminda hopi hende ta pasa, basta ta den e teritorio di nos kongregashon. (Wak Nos Ministerio di Reino di yüli 2013, pág. 5.) Si e kantidat di hende ku ta pasa einan mengua, e Komité di Sirbishi di Kongregashon por disidí di kambia e sitio ku ta pone e mesa òf stènt portátil pa un sitio kaminda tin mas hende ta pasa.
Rebishita i Kurso di Beibel: Durante sierto oranan di dia algun rasgo di sirbishi no ta asina produktivo. Pues, dikon no programá pa hasi rebishita i duna kurso di Beibel den e oranan ei? Por ehèmpel, si djasabra mainta sirbishi di kas pa kas ta mas produktivo, lo ta mas práktiko pa nos duna kursonan di Beibel atardi òf anochi. Ora nos ta usa outo pa hasi rebishita, lo ta mihó pa limitá e kantidat di publikadó ku ta bai huntu pa asina nos por logra mas den sirbishi.
Ta bèrdat ku nos por konta nos oranan tur biaha ku nos partisipá den sirbishi. Pero nos goso ta oumentá ora nos ta mira fruta di nos trabou. Si na un sierto ora di dia un rasgo di sirbishi no ta produktivo, purba un otro rasgo. Laga nos pidi Yehova, “Doño di e kosecha,” pa yuda nos usa nos tempu bon den sirbishi.—Mat. 9:38.