Usa Bo Tempu Bon
1 Tur hende tin e mésun cantidad di ora disponibel pa siman. E parti cu nos ta dedicá na plama e bon nobo ta masha balioso, pasobra ta tempu usá den un trabou di salba bida. (Rom. 1:16) Nos ta demostrá nos aprecio pa esaki dor di prepará bon pa nos sirbishi, yega na tempu na reunionnan pa sirbishi i sali unbes pa e teritorio. Nos ta preferá di predicá, cu para warda. Ya cu Jehova a siña nos cu “pa tur cos tin un tempu señalá,” nos tin cu usa e tempu cu nos a apartá pa e ministerio bon.—Ecl. 3:1.
2 Manehá Bo Tempu na un Manera Sabí: Nos ta ricibí hopi bendicion ora nos tene firmemente na un programa cu ta duna nos chens di participá cu regularidad den e ministerio di veld. Di mes, mas tempu nos pasa den sirbishi, mas resultado positivo nos lo por logra. Cu un poco ahuste chikitu den nos rutina, nos lo por dedicá mas tempu den sirbishi di veld? Por ehempel, despues di traha diasabra cu revista, nos lo por tuma poco tempu extra pa haci un par di rebishita? Si nos tin basta ratu den sirbishi riba diadomingo, nos lo por dedicá algun tempu tambe na haci rebishita of na conducí un studio di Bijbel? Lo por ta posibel pa agregá un poco testificacion riba caya na nos actividad di cas-pa-cas? Podisé nos lo por mehorá nos sirbishi den e maneranan aki i otro manera mas.
3 Si nos no tene cuidou, nos por perde tempu balioso ora nos ta den e ministerio. Naturalmente, ora solo ta fuerte of ta haci hopi friu, un pausa corticu lo refrescá nos i yuda nos sigui traha. Pero, sea balansá, ya cu kisas no ta tur biaha ta necesario pa tuma pausa.
4 Den añanan recien a bira cada bes mas difícil pa haña hende na cas. Pa trata cu e situacion aki, hopi publicadó ta predicá di cas-pa-cas na un otro ora di dia. Pakico no purba predicá na fin di atardi of comienso di anochi?
5 Ta mihó pa nos no para combersá cu otro ora nos ta traha riba caya. Mas bien, nos tin cu para for di otro i acercá e hendenan pa asina cuminsá combersacion cu nan. Dje manera ei nos ta usa nos tempu mas eficas i ta saca mas goso for dje trabou.
6 Probechá di Oportunidadnan pa Duna Testimonio: Ora un ama di cas a bisa cu e no tabata interesá, un Testigo a puntr’é si tabatin otro hende na cas cu e por a papia cuné. Esaki a hiba na un combersacion cu e homber di cas, kende tabata malu pa hopi aña i pa gran parti di tempu tabata drumí na cama. E speransa describí den e Palabra di Dios a renobá su interes den bida. No a tarda mashá cu el a lanta for di cama i tabata asistí n’e reunionnan na Salon di Reino i compartí su speransa nobo cu otro hende!
7 Un ruman muher tiener a aplicá e sugerencia di participá den sirbishi di veld durante e ora promé cu e Studio di Buki di Congregacion. Na su promé porta, el a topa un mucha muher di 13 aña cu a scucha cu atencion i a tuma literatura. E siguiente dia na scol, e ruman a mira e mésun mucha muher aki. Poco dia despues, el a ofrecé pa studia Bijbel cuné i e mucha muher a aceptá.
8 Haci Bo Tempu den Sirbishi Tempu di Calidad: Participá cu regularidad den sirbishi di veld ta yuda nos desaroyá nos abilidadnan pa presentá e bon nobo. Bo por mehorá bo abilidad di cuminsá un combersacion na porta dor di usa un introduccion mas eficas? Lo bo por bira un maestro mas ábil den conducí studio di Bijbel? Si bo haci esei, lo bo ègt haci bon uso di bo tempu den sirbishi i haci bo ministerio mas productivo.—1 Tim. 4:16.
9 Como cu “e tempu cu a keda ta reducí,” nos bida mester ta yen di obra cristian. (1 Cor. 7:29) Apartá tempu pa e actividad di predicá mester ta un di nos prioridadnan principal. Laga nos tin un participacion sano i celoso den e ministerio. Tempu ta un posesion balioso cu Jehova a duna nos. Semper us’é bon i na un manera sabí.
[Box on page 4]
Considerá e Sugerencianan Aki:
◼ Yega reunionnan pa sirbishi na tempu.
◼ Te asina leu cu ta razonabel, tene gruponan di predicá chikitu.
◼ Evitá di tarda pa yega n’e teritorio.
◼ Traha den teritorio ora mayoria hende ta na cas.
◼ Si ta safe pa haci esei, traha de bes en cuando bo so.
◼ Haci e rebishitanan cu ta keda pegá cu e teritorio cu bo a traha di cas-pa-cas.
◼ Sigui traha den sirbishi ora otronan den e grupo ta keda den un cas.
◼ Ora cu ta posibel i si e circunstancia ta permití, traha mas cu un ora. Pidi contribucion ora bo ta ofrecé literatura riba caya.