Bo Ta Prepará pa un Emergensia Médiko?

Un hende por haña su mes diripiente i sin previo aviso ku un emergensia médiko. (Sant. 4:14) P’esei, esun ku ta prudente lo prepará mas mihó posibel. (Pro. 22:3) Bo a disidí ki tratamentu médiko lo bo aseptá? I bo a pone bo desishon por eskrito? Pa yuda bo den esaki, a prepará e dokumental Asistensia Médiko sin Transfushon: Kumpliendo ku Nesesidat i Derecho di Pashènt. E ta e di dos presentashon riba e DVD titulá Seri di Dokumentario—Alternativanan pa Transfushon. Ora bo ta wak e, mira si bo por kontestá e siguiente preguntanan. Komo ku tin algun esena kòrtiku di operashon, mayornan mester evaluá si nan ta laga nan yunan chikí wak e dokumental huntu ku nan.

(1) Dikon algun profeshonal den e kampo médiko ta rekonsiderando uso di transfushon di sanger? (2) Menshoná tres ehèmpel di operashon kompliká ku dòkternan a hasi sin transfushon di sanger. (3) Dikon míles di dòkter i siruhano rònt mundu ta dispuesto pa trata pashènt sin usa transfushon di sanger? (4) Kiko estudionan resien hasí den hospitalnan a revelá tokante uso di sanger? (5) Kiko ta e riesgonan médiko ku transfushon di sanger ta trese kuné? (6) Na ki konklushon hopi eksperto a yega relashoná ku e benefisionan di alternativa pa transfushon? (7) Kiko ta kousa anemia i kiko por hasi pa remedi’é? (8) Kon por stimulá kurpa di un pashènt pa produsí sèl kòrá di sanger? (9) Ki téknika dòkternan sa usa pa minimisá pèrdida di sanger durante operashon? (10) Por usa alternativanan pa transfushon den kaso di mucha òf ora ta trata di hende ku ta den un situashon di bida òf morto? (11) Kua ta un di e prinsipionan étiko mas importante di un bon kuido médiko?

Tene kuenta ku algun di e tratamentunan menshoná den e dokumental akí tin di haber ku konsenshi. Pues, no laga te ora un emergensia médiko presentá pa e ora ei numa skohe kiko lo bo aseptá òf rechasá. Pa yuda bo tuma bo propio desishon a base di loke bo a siña, wak kapítulo 7 di e buki “Keda den e Amor di Dios” huntu ku e referensianan menshoná den dje i e suplemento den Nos Ministerio di Reino di novèmber 2006. Despues, si bo ta batisá, yena loke bo a disidí riba e karchi DPA i perkurá pa bo tin e semper huntu ku bo.

[Komentario di e plachi na página 3]

Bo a disidí ki tratamentu médiko lo bo aseptá i bo a pone esaki por eskrito?