Warda Esaki

Kiko Mi Ta Pensa di Frakshonnan di Sanger i Tratamentu Médiko Ku Ta Enbolbé Mi Mes Sanger?

Beibel ta manda kristiannan pa “apstené nan mes di . . . sanger.” (Echo. 15:20) Pues, Testigunan di Yehova no ta aseptá transfushon di sanger kompletu ni di e kuater komponentenan prinsipal di sanger, esta, sèl kòrá di sanger, sèl blanku di sanger, plaketa i plasma. Tampoko nan no ta duna sanger ni warda nan mes sanger pa tum’é bèk despues den un transfushon.—Lev. 17:13, 14; Echo. 15:28, 29.

Kiko ta frakshon di sanger, i pakiko ta keda na kada kristian pa disidí si e ta tuma frakshon di sanger?

Frakshonnan di sanger ta elementonan di sanger ku ta ser saká via di un proseso ku yama frakshonamentu. Por ehèmpel, por dividí plasma, un di e kuater komponentenan prinsipal di sanger, den e siguiente supstansianan: awa, rònt di 91 porshento; proteina, manera albumina, globulina i fibrinógeno, rònt di 7 porshento; i otro supstansianan, manera alimento, hormon, gas, vitamina, desperdisio i elektrolito, rònt di 1,5 porshento.

E mandato pa apstené di sanger ta konta pa frakshonnan tambe? Nos no por bisa esei ya ku Beibel no ta duna instrukshon spesífiko riba e punto aki.a Naturalmente, hopi frakshon ku ta ser saká for di sanger ta bini di sanger ku a ser duná pa propósitonan médiko. Kada kristian mester disidí a base di su konsenshi si lo e aseptá òf rechasá e uso médiko di e supstansianan aki.

Ora bo tin ku tuma e tipo di desishonnan ei, hasi bo mes e siguiente preguntanan: Mi ta konsiente ku si mi rechasá tur frakshon di sanger, esei ta nifiká ku lo mi no aseptá sierto remedi, manera e tiponan ku ta kombatí vírus i enfermedat òf ku ta yuda sanger kuaha pa para sangramentu? Mi por splika un dòkter pakiko mi ta rechasá òf aseptá uso di sierto frakshon di sanger?

Pakiko ta keda na ami pa disidí si mi ta aseptá algun tratamentu médiko ku ta enbolbé uso di mi mes sanger?

Ounke kristiannan no ta duna sanger ni warda nan mes sanger pa tum’é bèk despues den un transfushon, tin algun tratamentu òf tèst médiko ku ta enbolbé e persona su mes sanger di kua no por bisa sin mas ku nan ta bai kontra di prinsipionan di Beibel. P’esei, kada kristian mester disidí a base di su konsenshi si e ta aseptá òf rechasá algun tipo di tratamentu médiko ku ta enbolbé uso di su mes sanger.

Ora di tuma e desishonnan ei, hasi bo mes e siguiente preguntanan: Si nan ta bai laga parti di mi sanger sirkulá pafó di mi kurpa i asta interumpí e fluho pa un ratu, mi konsenshi lo permití mi konsiderá e sanger aki komo parti di mi kurpa ainda, pues sin ku mi mester eksigí pa “bash’é riba suela”? (Deu. 12:23, 24) Si durante un tratamentu médiko, nan saka poko sanger for di mi kurpa, modifik’é i hink’é bèk den mi kurpa, esei lo molestiá mi konsenshi entrená pa Beibel? Mi ta konsiente ku si mi rechasá tur tratamentu médiko ku ta enbolbé uso di mi mes sanger, esei ta nifiká ku mi ta rechasá tratamentunan manera diálisis òf uso di mashin ku ta remplasá kurason i pulmon durante operashon? Mi a konsiderá e asuntu aki den orashon promé ku mi tuma un desishon?b

Ki desishon ami ta tuma?

Konsiderá e dos klatnan riba e siguiente páginanan. Klat 1 ta menshoná algun di e frakshonnan saká for di sanger i kon nan ta ser usá normalmente den medisina. Pa kada un di e frakshonnan aki, yena bo desishon personal, esta, si lo bo aseptá òf rechasá nan uso. Klat 2 ta menshoná algun tratamentu médiko komun ku ta enbolbé bo mes sanger. Pa kada un di e tratamentunan aki, yena bo desishon personal, esta, si lo bo aseptá òf rechasá nan. No ta trata aki di dokumentonan ofisial, pero lo bo por usa bo kontestanan riba e klatnan aki pa yuda bo yena bo tarheta di DPA (dokumento duradero di apoderashon médiko).

Abo tin ku tuma bo propio desishonnan i no basa esakinan riba konsenshi di otro hende. Meskos tambe, ningun hende no mester kritiká e desishonnan di un otro kristian. Den e asuntunan aki, “kada [ken] lo karga su mes karga” di responsabilidat.—Gal. 6:4, 5.

[Nota]