No Pensa Ku Bo Ta Inkapas
1. Dikon algun publikadó tin miedu di ofresé estudio di Beibel?
1 Bo tin miedu di ofresé un estudio di Beibel pasobra bo ta sinti ku bo no ta kapas pa kondusi un estudio? Algun sirbidó fiel di pasado, manera Moises i Yeremías, tambe a sinti ku nan no tabata kapas pa kumpli ku nan asignashon. (Éks. 3:10, 11; 4:10; Yer. 1:4-6) Pues, e sintimentu ei ta masha normal. Pero kon nos por vens’é?
2. Dikon nos no mester limitá nos na prediká di kas pa kas i laga e trabou di kondusí estudio di Beibel pa otronan?
2 Ta bon pa nos kòrda ku Yehova lo no pidi nos hasi algu ku nos no por hasi. (Sal. 103:14) Pues, e enkargo ku el a duna nos di “hasi hende disipel” i “siña nan” ta algu ku nos por kumpli kuné. (Mat. 28:19, 20) Esaki no ta un privilegio solamente pa e publikadónan mas kapas òf ku mas eksperensia. (1 Kor. 1:26, 27) P’esei nos no mester limitá nos na prediká di kas pa kas i laga e trabou di kondusí estudio di Beibel pa otronan.
3. Kon Yehova ta kapasitá nos pa kondusí estudio di Beibel?
3 Yehova Ta Kapasitá Nos: Yehova ta esun ku ta kapasitá nos pa hasi disipel. (2 Kor. 3:5) Pa medio di su organisashon e ta siña nos bèrdatnan di Beibel ku ni e hendenan bon siñá di e mundu akí no konosé. (1 Kor. 2:7, 8) El a perkurá pa nos haña den su Palabra e diferente métodonan di siñansa ku Hesus, e Gran Maestro, a usa. I kontinuamente nos ta haña entrenamentu den kongregashon. Ademas, Yehova a duna nos e hèrmèntnan ku nos tin mester pa kondusí estudio di Beibel. Un di nan ta e buki Beibel Ta Siña ku ta splika e bèrdat na un manera lógiko i fásil pa komprondé. Pues, no ta dje difísil ei pa kondusí estudio di Beibel.
4. Kiko ta duna nos e konfiansa ku Yehova lo yuda nos?
4 Ku yudansa di Yehova, tantu Moises komo Yeremías a kumpli ku nan asignashon. (Eks. 4:11, 12; Yer. 1:7, 8) P’esei, laga nos tambe pidi Yehova yuda nos. De echo, ora nos ta kondusí un estudio di Beibel, nos ta siñando hende e bèrdat tokante di Yehova, i esei sigur ta algu agradabel den Su bista. (1 Huan 3:22) P’esei, pone e meta pa ofresé i kuminsá estudio di Beibel. Lo bo disfrutá di dje i lo bo haña hopi bendishon.