Prepará pa Memorial ku un Kurason Gososo
1. E temporada di Memorial ta un bon okashon pa hasi kiko?
1 E selebrashon di Memorial riba djamars 26 di mart ta duna nos un bon oportunidat pa alegrá den e medio ku Dios a usa pa nos salbashon. (Isa. 61:10) Pero si nos demostrá e goso ei asta den e dianan promé ku Memorial, nos lo ta mihó prepará p’e okashon. Kon asina?
2. Kiko ta motivá nos pa prepará pa Memorial?
2 Prepará pa e Selebrashon: E Sena di Señor ta un okashon serio pero tòg simpel. No opstante, ta importante pa plania adelantá pa no pasa ningun detaye por alto. (Pro. 21:5) Mester skohe un ora i sitio adekuá, buska e pan i e biña apropiá i limpia i prepará e lugá di reunion. Ademas, e oradó asigná tin ku prepará bon, i tantu e ùshernan komo e rumannan ku ta pasa e pan i e biña mester sa presis kiko nan tin ku hasi. Sin duda, mayoria di e kosnan akí ta kla kaba. Nos gratitut p’e sakrifisio di reskate ku lo salba nos ta motivá nos pa prepará bon pa e okashon sagrado akí.—1 Ped. 1:8, 9.
3. Kon nos por prepará nos kurason pa e Sena di Señor?
3 Prepará Nos Kurason: Ta importante tambe pa nos prepará nos kurason pa komprondé e pleno nifikashon di Memorial. (Èsd. 7:10, NW) Pa logra esaki, nos mester saka tempu pa analisá e porshon di Beibel pa e temporada di Memorial, anto reflekshoná riba e último dianan di Hesus su bida riba tera. Ora nos meditá riba e spiritu di sakrifisio propio ku Hesus a manifestá, nos lo sinti nos motivá pa imit’é.—Gal. 2:20.
4. Kua di e benefisionan di e reskate ta duna bo mas goso?
4 E morto di Kristu ta demostrá ku Yehova tin derecho di ta e Dios soberano. E ta libra nos di piká i morto. (1 Huan 2:2) E ta habri kaminda pa nos por tin un bon relashon ku Dios i tambe haña bida eterno. (Kol. 1:21, 22) E ta yuda nos tambe pa keda determiná pa kumpli ku nos dedikashon na Yehova i sigui e ehèmpel di Kristu fielmente. (Mat. 16:24) Ora bo prepará pa e binidero Memorial i asistí na dje, lo bo sinti un goso mas grandi ainda!