Kon pa Usa e Foyeto Ken Awe Ta Hasi e Boluntat di Yehova?
Diseñá pa Dirigí Studiante di Beibel na Nos Organisashon
1. Ku ki tres meta a produsí e foyeto Boluntat di Yehova?
1 Bo a kuminsá usa e foyeto nobo Ken Awe Ta Hasi e Boluntat di Yehova? Su meta ta (1) pa laga e studiante di Beibel siña konosé nos, (2) pa yud’é haña sa mas di nos aktividatnan i (3) pa lag’é mira kon nos organisashon ta funshoná. Komo ku kada lès di e foyeto Boluntat di Yehova ta di ún página, ta fásil pa trata un lès den 5 pa 10 minüt na fin di kada estudio.
2. Deskribí e diseño i karakterístikanan di e foyeto akí.
2 Su Diseño: Manera bo por a nota den e paragraf ariba, e foyeto ta partí den tres sekshon; kada un ta trata un aspekto di e organisashon di Yehova. E tema di kada un di e 28 lèsnan ta den forma di pregunta, i e suptemanan ku lèter diki ta kontestá e preguntanan ei. Tambe tin potrèt di mas ku 50 pais, pa asina duna e studiante un bista di e alkanse internashonal di nos obra. Vários lès tin e kuadro “Bo Ke Sa Mas?,” ku ta ofresé sugerensianan ku bo por animá bo studiantenan pa apliká.
3. Kon nos por usa e foyeto Boluntat di Yehova?
3 Kon Bo Por Us’é? Kuminsá na mustra e studiante e tema di e lès ku ta den forma di pregunta. Despues, miéntras ku boso ta lesa e paragrafnan huntu, hala su atenshon na e suptemanan ku lèter diki. Kaba, trata e preguntanan di repaso na final di e página. Bo por lesa e lès kompleto, òf, si bo ta preferá, bo por trata e lès paragraf pa paragraf. Usa disernimentu ora di disidí kua teksto menshoná bo ta lesa i no keda sin komentá riba e potrètnan ni e kuadro “Bo Ke Sa Mas?” Den mayoria di kaso ta sabí pa konsiderá e lèsnan den e sekuensia ku nan ta aparesé. Sinembargo, si un lès ta trata un punto ku na e momento ei ta di interes, bo por trata esaki sin niun problema. Por ehèmpel, si un asamblea òf kongreso ta na kaminda, bo por bula bai na lès 11.
4. Dikon nos ta kontentu di por tin e hèrmènt nobo akí?
4 Ora nos ta studia Beibel ku un persona, nos ta yud’é konosé nos Tata selestial. Pero nos tin ku siñ’é tambe tokante e organisashon di Yehova. (Pro. 6:20) Nos ta masha kontentu di por tin e hèrmènt nobo akí ku por yuda nos hasi esaki!