Kaha di pregunta

◼ Kiko nos mester siña nos yunan pa nan krese den sentido spiritual?

Mayornan kristian ta hasi hopi esfuerso pa lanta nan yunan “den e disiplina di Yehova i inkulká su manera di pensa den nan.” (Efe. 6:4) Por ehèmpel, nan ta analisá e teksto di dia tur mainta ku nan yunan pasobra nan sa ku esei ta duna bon resultado. Durante Adorashon Komo Famia i na otro okashon, algun famia ta papia riba vidio ku nan a wak huntu, trata algun material spesífiko di e artíkulonan online di Los jóvenes preguntan, hunga esenanan di relatonan bíbliko òf tene seshonnan di práktika. Sinembargo, pa nos yunan “alkansá madures,” nan mester siña tambe bèrdatnan profundo di Beibel.—Heb. 6:1.

Pensa un ratu riba loke nos ta siña hende den teritorio. Por lo general, for di e bishita inisial òf na e siguiente bishita, nos ta hasi esfuerso pa kuminsá un estudio di Beibel for di e buki Kiko Beibel Ta Siña Realmente? Despues di e publikashon ei, nos ta usa e buki “Keda den e Amor di Dios.” Dikon nos ta hasi esei? E buki Beibel Ta Siña ta duna e studiante e konosementu básiko di e Skritura, miéntras e buki “Amor di Dios” ta siñ’é kon pa apliká prinsipionan di Beibel den su bida. E dos publikashonnan akí ta yuda esnan nobo pa ta “ankrá” den Kristu i bira “stabil den fe.” (Kol. 2:6, 7) Pero e material akí lo no ta bon tambe pa nos yunan? Nan tambe mester siña di e reskate, e Reino i e kondishon di e mortonan. Nan tin ku komprondé tambe dikon Dios ta permití sufrimentu i kon nos por sa ku nos ta biba den e último dianan di e mundu malbado akí. Nos yunan mester ta konvensí ku Testigunan di Yehova tin e bèrdat. Ademas, nan tin ku siña prinsipionan di Beibel i entrená “nan kapasidat di komprondé.” (Heb. 5:14) Ta bèrdat ku mayornan tin ku tene kuenta ku e edat di nan yunan i kiko nan por kapta. Pero ta bon pa no balotá nan, pasobra hopi mucha tin e kapasidat pa komprondé bèrdatnan profundo di Beibel for di un edat hopi yòn.—Luk. 2:42, 46, 47.