Siña for di Publikadónan ku Mas Eksperensia

Nos tin masha apresio pa publikadónan ku tin mas eksperensia den e trabou di prediká. Algun di nan tin años ta sirbi Yehova fielmente i otronan kisas resientemente a bira mas ábil den sirbishi. E rumannan akí a mira kon Hesus ta dirigí e kongregashon kristian den e último dianan akí i ta oumentá e trabou di prediká i hasi disipel. (Mat. 28:19, 20) Ora nan ta partisipá den e trabou akí, nan ta “risibí e poder ku ta surpasá esun di hende” i esaki ta yuda nan trata ku nan mes difikultat- i pruebanan. (2 Kor. 4:7) Nos por siña hopi for di e publikadónan ku mas eksperensia akí. Nan ta kla pa siña otro publikadónan loke nan a siña i nos mester probechá di tur oportunidat pa siña di nan eksperensia. (Sal. 71:18) Pero kon nos por hasi esei?

Den Sirbishi: Pa publikadónan nobo por mehorá den nan sirbishi, esnan ku mas eksperensia mester duna nan guia. Bo por siña hopi ora bo opservá kon publikadónan ku mas eksperensia ta traha den sirbishi. (Wak e di tres paragraf bou di e suptema “Yuda Publikadónan Nobo” di e artíkulo “Mantené Bo Entusiasmo den e Trabou di Prediká” den E Toren di Vigilansia di 15 di febrüari 2015.) Ki benefisio abo a saka ora bo a traha den sirbishi ku publikadónan ku mas eksperensia?

Dikon bo no ta pidi un publikadó ku tin hopi eksperensia pa traha ku bo den sirbishi? Si e ruman akí tin problema ku salú, kisas de bes en kuando bo por tene un di bo estudionan di Beibel na su kas. I ora boso kaba di studia, bo por puntra e publikadó ku mas eksperensia kon el a haña ku e estudio a bai i pidié duna bo algun konseho.

Pasa Tempu ku Nan: Hasi esfuerso pa siña konosé publikadónan ku mas eksperensia. Bo por invitá un di nan na bo Adorashon Komo Famia i hasié algun pregunta. Asina bo por haña sa kon el a bini den e bèrdat, kon Yehova a bendishon’é, kon e kongregashon a krese for di tempu ku el a bira un Testigu i ki bon eksperensia el a haña sirbiendo Yehova. Si e publikadó tin problema ku salú, kisas bo por tene bo Adorashon Komo Famia na su kas.

Sea komprensivo i balansá den loke bo ta spera di nan. Manera nos tur, publikadónan ku mas eksperensia tin diferente don den sirbishi. (Rom. 12:6-8) Algun di nan ta di edat avansá, i esaki ta pone ku nan no por pasa hopi tempu ku nos. Sinembargo, nan ta sirbi Yehova fielmente i nos por siña hopi for di nan eksperensia.