Kon pa Mehorá Nos Sirbishi: Entrená Studiantenan di Beibel

Dikon Esaki Ta Importante: Disipelnan nobo di Hesus mester siña kumpli ku “tur loke” Hesus a manda nos hasi, inkluso siña otro hende e bèrdat. (Mat. 28:19, 20) Hopi studiante di Beibel ya ta partisipá den e Skol di Ministerio Teokrátiko i kisas ta prediká informalmente na nan famia- i amigunan. Pero, segun ku nan ta haña mas apresio pa loke nan ta siña i ta komprondé ku Yehova ke pa tur hende skucha e bon notisia, kisas nan ta ekspresá nan deseo di ke sali den sirbishi di vèlt. (Rom. 10:13, 14) Despues ku nan bira publikadó no batisá, un bon training lo yuda nan haña konfiansa pa sigui progresá den sentido spiritual.—Luk. 6:40.

Kon pa Hasié:

Yuda e publikadó nobo buska e publikashonnan ku e mester pa e trabou di prediká i hasi disipel. Mustr’é kon abo ta organisá bo tas di sirbishi i splik’é pakiko bo tin kada publikashon den bo tas.
Huntu boso por skohe un presentashon di Nos Ministerio di Reino i praktik’é. Animá e studiante pa hasi e presentashon ku su mes palabra. Train algun marko di sirkunstansia for di e buki Skol di Ministerio, página 82, ku ta komun den boso teritorio. Enfatisá ku ta importante pa nos ta modesto den nos forma di bisti i kuida nos aparensia.—2 Kor. 6:3, 4.
Sigui entrená e studiante gradualmente. Mustr’é un karchi di teritorio i siñ’é kon pa usa un registro di kas pa kas. Lag’é wak kon bo ta hasi anotashon di dato di hende ku mustra interes. Siñ’é kon pa usa tantu jw.org komo e foyeto chikí, na spañó, Bon Nobo pa Hende di Tur Nashon den sirbishi. Yud’é hasi rebishita.—1 Kor. 3:6.
Tene pasenshi i elogiá e studiante pa e progreso ku e ta hasi. (Pro. 25:11) Sea un bon ehèmpel. Pa añanan despues, e publikadó nobo lo kòrda bo zelo den sirbishi i e interes ku bo a mustra den dje.

Purba di Hasi Esaki Durante e Luna Akí:

Si bo tin un studiante ku a bira publikadó, traha di kas pa kas kuné i lag’é bai ku bo na un rebishita òf un estudio di Beibel. Si bo no ta studia ku un publikadó nobo, invitá un publikadó ku no tin hopi eksperensia pa traha ku bo.