Parti 10: Kon pa Kondusí Estudio di Beibel Progresivo
Train Studiantenan den e Ministerio di Kas pa Kas
1 Ora e ansianonan determiná ku un studiante di Beibel ta kualifiká komo un publikadó no-batisá, e por kuminsá sali huntu ku e kongregashon den e predikashon. (Wak e buki Organisá pa Hasi Yehova Su Boluntat, na spañó, pág. 79-81.) Kon nos por yuda e studiante pa e por kuminsá prediká di kas pa kas?
2 Prepará Huntu: No tin nada mihó ku un bon preparashon. Mustra e studiante na unda e por haña presentashonnan sugerí den Nos Ministerio di Reino i e buki Rasonamentu, i yud’é skohe un introdukshon simpel ku ta práktiko pa boso teritorio. Anim’é for di prinsipio pa usa e Beibel den su ministerio.—2 Tim. 4:2.
3 Ta masha benefisioso pa un publikadó nobo train e presentashonnan. Ora e studiante ta train e presentashon, mustr’é kon e por kontestá e diferente preguntanan ku ta komun den teritorio, sin ofendé hende. (Kol. 4:6) Sigur’é ku ministernan kristian no tin nodi sa e kontesta riba tur pregunta ku un doño di kas lo por hasi. Den kasonan asina hopi bes ta mihó pa bisa e doño di kas ku lo bo bai buska informashon, anto ku lo bo bolbe bèk pa kontestá su pregunta.—Pro. 15:28.
4 Prediká Huntu: E promé bes ku e studiante ta sali den e ministerio di kas pa kas, lag’é opservá kon bo ta usa e presentashon ku boso dos a prepará huntu. Kaba lag’é partisipá. Den algun kaso, kisas ta mihó pa laga e publikadó nobo hasi solamente un parti di e presentashon, por ehèmpel bo por lag’é lesa un teksto i komentá riba dje. Tene kuenta ku e personalidat i abilidat di e studiante. (Fil. 4:5, NW) Sinti bo liber pa elogi’é segun ku bo ta entren’é progresivamente den e diferente aspektonan di e obra di prediká.
5 Ta importante pa yuda un publikadó nobo establesé un programa pa partisipá den sirbishi riba un base regular, hasiendo esei semanalmente si ta posibel. (Fil. 3:16, NW) Hasi areglo spesífiko pa traha huntu kuné den sirbishi, i anim’é pa traha huntu ku otro rumannan seloso tambe. Nan ehèmpel i asosiashon lo yud’é bira ábil i haña goso den e predikashon di kas pa kas.