Parti 11: Kon pa Kondusí Estudio di Beibel Progresivo
Yuda Publikadónan Nobo Hasi Rebishita
1 Ora un studiante di Beibel kuminsá partisipá den e trabou di prediká, lo e topa hende ku ta mustra interes den e bon nobo. Kon nos por yuda e publikadó nobo hasi rebishita efektivo i kultivá interes di e personanan ku e topa?
2 Preparashon pa un rebishita ta kuminsá for di e promé bishita. Animá e studiante pa mustra interes sinsero den e personanan ku e papia kuné. (Fil. 2:4) Na un manera progresivo, train e pa animá e doñonan di kas pa ekspresá nan mes, p’e skucha loke nan ta bisa i tuma nota di loke ta preokupá nan. Ora un persona mustra interes, laga e publikadó nobo skirbi e informashon relevante tokante e bishita. Usa e informashon ei pa yud’é plania e siguiente kòmbersashonnan.
3 Prepará pa Bai Bèk: Repasá e promé kòmbersashon, i mustra e studiante kon pa selektá un aspekto di e mensahe di Reino ku lo atraé e doño di kas. (1 Kor. 9:19-23) Prepará huntu kuné un presentashon breve den kua tin un teksto di Beibel i un paragraf for di un publikashon di estudio. Ademas, formulá un pregunta ku e por hasi na final di e kòmbersashon pa asina pone un fundeshi pa e siguiente bishita. Mustra e publikadó nobo kon kada bes ku e bishitá e persona e por dun’é un tiki mas konosementu di e Palabra di Dios.
4 Ta bon tambe pa siña e studiante un introdukshon simpel ku e por usa na e rebishita. Despues di kumindá e doño di kas, lo e por bisa: “Mi a gusta e kòmbersashon ku nos tabatin biaha pasá. I mi a bolbe pa kompartí mas informashon di Beibel tokante [menshoná e tópiko].” Tambe lo bo tin ku siña e publikadó nobo kon pa reakshoná ora un otro persona bini na porta.
5 Sea Diligente den Hasi Rebishita: Animá e studiante pa pone un bon ehèmpel dor di bolbe mesora serka tur hende ku mustra interes. Pa haña hende na kas kisas nos tin ku insistí dor di bai bes tras bes. Siña e studiante kon pa traha afsprak pa hasi rebishita i yud’é komprondé ku e tin ku bolbe manera el a primintí. (Mat. 5:37) Train e publikadó nobo pa ta amabel, p’e mustra konsiderashon i rèspèt segun ku e ta buska hende ku kualidatnan di karné i ta kultivá nan interes.—Tito 3:2.