Rebishita Ta Hiba na Studio di Beibel
1 Hesus no a manda su siguidónan pa prediká so, sino tambe pa ‘hasi disipel i siña nan.’ (Mat. 28:19, 20) Un predikadó ta proklamá, pero un maestro ta hasi mas ku esei. E ta instruí, splika i duna prueba. Un manera ku nos por siña otro hende ta dor di rebishitá esnan ku ta interesá ku e meta di kuminsá un studio di Beibel ku nan.
2 Ken nos mester rebishitá? Hasi sigur di bai bèk serka tur esnan ku aseptá literatura òf mustra djis un chispa di interes den e bon nobo. Si bo haña hende interesá ora bo prediká na un sitio públiko, purba haña e persona su adrès òf number di telefon pa e interes ei por wòrdu kultivá. Sea optimista pa kuminsá studio di Beibel! Sigui buska esnan ku lo aseptá un oferta pa studia Beibel, i sin duda lo bo haña nan.—Mat. 10:11.
3 Mustra Interes Personal: Preparashon pa un rebishita efektivo ta kuminsá na e promé bishita. Evangelisadónan eksitoso ta tuma nota di loke ta interesá e doño di kas, i nan ta usa esei komo base pa e siguiente bishitanan. Algun publikadó ta haña ku ta bentahoso pa lanta un pregunta na final di e rebishita pa stimulá e interes di e doño di kas pa e siguiente bishita. Nos interes sinsero den hende ta yuda nos pa sigui pensa riba nan asta despues ku nos a bai for di nan kas, i ta motivá nos pa bolbe rebishitá nan sin tarda. Si ta posibel, purba bolbe ora e interes ta bibu—kisas denter di un òf dos dia.
4 Ora di hasi rebishita, buska manera pa sigui edifiká riba bo kombersashon anterior. Pone meta pa kompartí por lo ménos un punto bíbliko edifikante kada bes ku bo rebishit’é, i sea dispuesto pa skucha. Siña konosé e doño di kas mas mihó. Anto na e siguiente bishitanan, kompartí e bèrdatnan for di e Palabra di Dios ku di un forma masha direkto ta trata ku su preokupashonnan.
5 Sea Konsiente pa Kuminsá Studio di Beibel: Hasi rebishita ku e meta pa kuminsá studio di Beibel. Kon bo por hasi esaki? Menshoná ku bo kier kompartí un punto interesante, i habri e buki Conocimentu òf e foyeto Rekerí i bai na un paragraf ku bo ta pensa ku e persona lo gusta. Lesa e paragraf ei, konsiderá e pregunta, i papia riba un òf dos teksto bíbliko ku no ta sitá. Por hasi esaki na porta di kurá mes, den sinku pa dies minüt. Konkluí dor di hasi e siguiente pregunta, anto hasi areglo pa sigui ku e konsiderashon na un otro momentu.
6 Kultivando tur interes ku nos haña ta un aspekto vital di nos ministerio. P’esei, apartá tempu den bo programa semanal pa hasi rebishita. Si bo hasi esei lo bo ta mas efektivo den bo sirbishi i lo bo haña berdadero goso.
[Study Questions]
1. Dikon e trabou di hasi rebishita ta asina importante?
2. Ken nos mester rebishitá?
3, 4. Kiko ta enserá hasi rebishita efektivo?
5. Ki método simpel por ser usá pa kuminsá studionan di Beibel?
6. Kon nos por demostrá ku nos ta komprondé e importansia di hasi rebishita?