Yuda Esnan ku e “Disposishon Korekto”
1 Tur hende tin un disposishon òf aktitut dominante ku ta ankrá den nan kurason figurativo. (Mat. 12:35) Beibel ta papia di un persona ku ‘den su kurason tin guera.’ (Sal. 55:21) Tin hende ta kla pa rabia. (Pro. 29:22, NW) Pero algun hende tambe tin e “disposishon korekto pa bida eterno.” (Echo. 13:48, NW) Den nos tempu Yehova ta hala serka dje e personanan ei ku tin e disposishon korekto. (Hag. 2:7) Kon nos por yuda nan bira adoradó di Yehova?
2 Hasi Rebishita Diligentemente: Ta vital pa nos tin e punto di bista korekto enkuanto hasimentu di rebishita pa asina nos por kumpli ku nos tarea di hasi disipel. (Mat. 28:19, 20) Nos ta diligente den kultivá e interes ku nos haña? Nos ta bolbe bishitá tur esnan ku a aseptá literatura òf ku a mustra interes den e bon nobo? Nos ta hasi esfuerso persistente pa yuda nan krese spiritualmente? Siendo ku bida di hende ta den wega, nos tin ku hasi esfuerso pa kultivá tur interes ku nos haña.
3 Tuma un ratu pa skirbi nòmber i adrès di un persona interesá ora ku e kòmbersashon ku nos tabatin kuné ta fresku ainda den nos mente. Hasi anotashon di e tema ku boso a papia riba dje, tekstonan ku a ser lesá i ki literatura bo a laga. Despues di esei, kòrda bolbe bèk mas pronto posibel.
4 Kon pa Hasi Rebishita: Ora bo ta hasi un rebishita ta bon pa bo ta kariñoso i amikal i mustra interes sinsero den e doño di kas. Tene e kòmbersashon simpel i bíbliko. Prepará un tema bíbliko interesante pa papia riba dje, i na final di e kòmbersashon, hasi un pregunta ku bo por kontestá na e siguiente bishita. Ta mihó pa no argumentá innesesariamente riba puntonan di bista ku no ta kuadra ku Beibel ku e doño di kas lo por ekspresá. Hasi esfuerso pa siña e persona bèrdatnan bíbliko a base di puntonan ku boso dos ta di akuerdo riba dje.—Kol. 4:6.
5 Pa hasi rebishita ta eksigí esfuerso, pero e rekompensanan ta duna satisfakshon. Un pionero na Hapon a pone komo meta pa tur luna e hasi mas rebishita. El a kuminsá anotá tur persona ku e topa den e trabou di kas pa kas, anto denter di shete dia e tabata rebishitá nan. El a prepará bon pa loke e tabata bai bisa i a hasi su sirbishi ku pleno konfiansa den e mensahe ku el a hiba pa e hendenan. Durante un di su rebishitanan el a logra kuminsá studia ku un persona ku a bisa: “Semper mi a nenga di skucha boso. Ta promé bes den mi bida ku mi a skucha.” E pionero su persistensia amoroso a duna bon resultado. Na fin di e promé luna el a raportá 10 studio di Beibel.
6 Hende su sirkunstansia ta kambia konstantemente. (1 Kor. 7:31, NW) Hopi bes nos tin ku hasi vários intento pa nos por haña un persona interesá na kas atrobe. Dor di hasi rebishita diligentemente, nos por yuda esnan ku tin e disposishon korekto pa haña e kaminda ku ta hiba na bida eterno.—Mat. 7:13, 14.
[Questions]
1. Ken Yehova ta hala serka dje den nos tempu?
2. Kiko kumpli ku nos tarea di hasi disipel ta enserá?
3. Kiko nos tin ku hasi despues ku nos a kaba di kòmbersá ku un persona den sirbishi?
4. Kon nos por hasi rebishitanan efikas?
5. Ki esfuerso un pionero a hasi, i kiko tabata e resultado?
6. Pakiko nos tin ku persistí den hasi rebishita?