Ta Busca—Mas Studio di Bijbel
1 Jehova Dios ta bendicionando su organisacion terenal cu crecementu continuo. Aña di sirbishi cu a pasa, 375.923 hende a bautisá mundialmente—un promedio di riba 1.000 disipel nobo pa dia, of rond di 43 pa ora! Apesar di décadanan di dificultad cu nos rumannan lo por a enfrentá den vários parti di mundu, e trabou di Reino ta floreciendo i nos ta mira aumentonan sobresaliente ta tumando lugá. Ta ki excitante pa lesa dje progreso cu ta tumando lugá den plama e bon nobo!
2 Na Curaçao, Aruba i Bonaire, nos tambe a mira e aña di sirbishi cu a pasa algun aumento den e promedio total di publicadó i pioneronan auxiliar, i den e cantidad di foyeto, i revista cu a laga. Tabatin un aumento den e cantidad di hende bautisá i den e asistencia na Memorial. Kico dje actividad di rebishita i di studio di Bijbel? E cantidad total di rebishita a cai i studionan di Bijbel a baha cu 5,5 porciento. I sin embargo, ta e rasgonan aki dje ministerio ta esencial pa e trabou di haci disipel. Kico cada un di nos por haci pa boltu e curso negativo cu tin den rebishita i studionan di Bijbel?
3 Fortalecé e Deseo pa Conducí un Studio: Nos tin cu wak pa nos mes ta spiritualmente fuerte i activo. Berdadero siguidónan di Cristo ta “celoso pa obranan excelente.” (Tito 2:14) Ora nos repasá nos ministerio, nos por bisa cu nos ta masha ansioso pa bai bek tur caminda cu nos a laga literatura den sirbishi? Nos ta entusiasmá pa ofrecé studionan di Bijbel na tur hende cu mustra interes? (Rom. 12:11) Of nos tin cu desaroyá un deseo mas grandi pa haci rebishita i cuminsá studionan di Bijbel na cas?
4 Nos lo keda spiritualmente refrescá i lo haña e poder di Dios su spiritu santu, dor di lesa Bijbel personalmente, asistí regularmente na reunion i studia e publicacionnan. (Efe. 3:16-19) Esaki lo fortalecé nos fe i confiansa den Jehova i nos amor pa nos próhimo. Nos lo ta motivá pa siña un otro hende e berdad, i asina haci nos ministerio interesante, exitoso i stimulante. Sí, nos lo kier tin mas studio di Bijbel!
5 Studia cu Bo Famia Promé: Mayornan cristian cu tin yunan ta biba na cas mester ta profundamente interesá den nan programa di studio di Bijbel regular cu e famia. (Deu. 31:12; Sal. 148:12, 13; Pro. 22:6) Lo ta masha bon pa mayornan studia e foyeto Rekerí i despues e buki Conocimentu cu nan yunan pa prepará nan pa cualificá como publicadó no-bautisá i pa dedicacion i bautismo. Naturalmente, por considerá material adicional, dependiendo dje necesidad i edad dje yu. Un mayor cu ta studia cu un yu no-bautisá por conta e studio, e ora i rebishitanan, manera a ser describí den e Caha di Pregunta di Nuestro Ministerio del Reino di april 1987.
6 Mehorá Organisacion Personal: Mirando e cantidad di revista, foyeto i buki cu ta ser lagá, no tin duda cu un gran cantidad di simia ta ser plamá. E simianan aki di berdad cu a ser sembrá ta contené tremendo potencial pa producí disipelnan nobo. Pero un cunukero of un hardinero lo keda berdaderamente satisfecho si e ta sigui planta i planta i, despues di tur su esfuerso, nunca ta tuma e tempu pa cosechá? Claro cu no. Mescos tambe, den e ministerio ta necesario pa bolbe bek.
7 Bo ta programá regularmente tempu pa haci rebishita? Bolbe bek pronto cerca tur persona cu a mustra interes. Haci rebishita cu e meta di cuminsá un studio di Bijbel. Bo ta tene un registro nechi, al dia i bon organisá di tur bo rebishitanan? Huntu cu e nomber i adres dje doño di cas, haci sigur di nota e fecha dje promé bishita, loke bo a laga, un descripcion breve di loke boso a papia, i un punto cu por sigui riba dje n’e siguiente bishita. Laga lugá habrí riba bo registro pa agregá informacion adicional despues di cada bes cu bo rebishitá e persona.
8 Analisá Con pa Haci un Rebishita: Cua ta algun punto pa tene na mente ora di haci rebishita cerca un persona interesá? (1) Sea caluroso, amigabel, entusiasmá i informal. (2) Considerá temanan of preguntanan cu ta interes’é. (3) Tene e consideracion simpel i bíblico. (4) Na cada bishita, trata na siña e doño di cas algu cu lo e reconocé como personalmente balioso p’e. (5) Crea anticipacion pa e tema cu lo bo considerá n’e siguiente bishita. (6) No keda muchu largu. (7) No haci preguntanan cu ta brongosá e doño di cas of cu ta pon’é sinti incómodo. (8) Usa dicernimentu pa no condená opinionnan robes of mal custumbernan dje doño di cas, promé cu el a cultivá aprecio pa cosnan spiritual.—Mira e suplemento di Nos Ministerio di Reino di mart 1997 pa haña mas yudansa en cuanto con pa tin éxito den haci rebishita i cuminsá studionan di Bijbel.
9 Explorá Tur Posibilidad: Den un congregacion, tabata posibel pa haña e nomber i number di apartamento di tur e habitantenan den un compleho di cas di alta seguridad. A skirbi un carta personal na cada residente, i a incluí dos tratado. Na fin dje carta, a ofrecé e persona un studio di Bijbel na cas i a agregá un number di telefon di manera cu lo e por reaccioná. Un par di dia despues, un yoncuman a bel pa pidi un studio. A rebishit’é e siguiente dia, i a cuminsá un studio den e buki Conocimentu. E mésun anochi ei el a asistí n’e Studio di Buki di Congregacion, i el a sigui asistí na tur e reunionnan. Casi mesora, el a cuminsá lesa su Bijbel tur dia i a haci progreso continuo den direccion di bautismo.
10 Publicadónan den un grupo na auto a haci areglo pa haci algun rebishita huntu. Ora un ruman muher a haci un di su rebishitanan, e persona cu el a bai busca no tabata na cas, pero un otro señora hóben a habri porta, bisando: “Mi tabata warda riba boso.” E doño di cas a ricibí e buki Conocimentu cerca un conocí. Pa ora cu e rumannan muher a yama na su porta ya el a lesa e buki completo dos biaha caba i a keda masha impresioná cu e informacion cu e tabata contené. El a bisa cu e no a keda sorprendí cu e Testigonan a yama na su porta e dia ei, pasobra el a pidi den oracion pa nan bini i studia Bijbel cuné. A start un studio, el a cuminsá asistí n’e reunionnan di congregacion, i a haci progreso rápido.
11 Poco tempu pasá, un ruman muher, bautisá pa casi 25 aña, a duna su mama un buki Conocimentu. Su mama, un miembro di iglesia, a cuminsá lesa e buki. Despues di a lesa dos capítulo, el a bel su yu muher i, pa sorpresa dje yu muher, e di: “Mi kier bira un Testigo di Jehova!” E mama a cuminsá studia i awor ta bautisá.
12 Purba e Sugerencianan Aki: Bo a yega di usa e método directo pa cuminsá studio? Bo por simplemente bisa: “Si bo kier tin un studio di Bijbel grátis na cas, mi por mustrá bo den solamente un par di minuut con esei ta bai. Si bo gusta, bo por sigui cuné.” Hopi hende no ta vacilá pa aceptá un oferta asina, i nan ta cla pa mira e demostracion di un studio di Bijbel.
13 For di principio dje studio, mustra e studiante con pa prepará di antemano dor di lesa e textonan mencioná i hala strepi bou di palabranan clave cu ta contestá e preguntanan imprimí. Concentrá solamente riba e puntonan principal. Aunke nos lo tin cu ta flexibel pa e promé par di sesionnan, ta importante pa tene un studio di Bijbel riba un base regular. Tene na mente con lo bo introducí oracion como un parti esencial dje studio i con lo bo prepará e studiante bíblicamente pa oposicion. Di tur manera, haci e studio interesante!
14 Di mes, no ta tur studiante di Bijbel ta progresá mésun lihé. No ta tur tin e mésun inclinacion spiritual ni no ta tur ta mes lihé den capta cos cu ta siña nan. Otro studiantenan tin un bida hopi ocupá i tal bes no por dedicá e tempu necesario pa abarcá henter un capítulo pa siman. Pues, den algun caso lo por ta necesario pa tuma mas cu un sesion di studio pa abarcá cierto capítulonan i algun luna adicional pa completá henter e buki. Den otro casonan kisas nos por studia e foyeto Rekerí promé i despues pasa dor dje buki Conocimentu. Esaki, huntu cu nan asistencia na reunionnan di congregacion, lo yuda cada studiante obtené un fundeshi sólido den e berdad.
15 Mas cu tur cos, pidi den oracion pa un studio di Bijbel! (1 Juan 3:22) Un dje experencianan mas recompensador pa un cristian ta pa ser usá dor di Jehova pa yuda un persona bira un disipel di Jesucristo. (Echo. 20:35; 1 Cor. 3:6-9; 1 Tes. 2:8) Awor ta e tempu pa mustra gran celo den e trabou di duna studio di Bijbel, cu pleno confiansa di ricibí Jehova su bendicion ricu riba nos esfuersonan pa cuminsá mas studio!
[Blurb on page 3]
Bo ta pidiendo den oracion pa un studio di Bijbel nobo?