Sigui Enfoká Riba e Trabou di Hasi Disipel
1. Kiko nos mester hasi pa yuda hende haña salbashon?
1 E rapòrt di sirbishi di aña 2014 ta mustra e zelo ku e pueblo di Dios tin i nan determinashon pa prediká e bon notisia di Reino. (Mat. 24:14) Pa medio di e predikashon di kas pa kas, kampañanan spesial pa parti tratado i invitashon i e predikashon na lugánan públiko, nos ta alkansá mas tantu hende ku nunka ku e mensahe di Beibel. Sinembargo, pa hende haña salbashon, nos mester studia Beibel ku nan pa yuda nan bira disipel di Hesus.—1 Tim. 2:4.
2. Kua preguntanan ta yuda nos keda alerta pa kuminsá estudio di Beibel?
2 Keda Alerta pa Kuminsá Estudio di Beibel: Si un hende mustra interes, bo ta tuma su datonan i ta purba di tuma kontakto kuné mas pronto posibel ku e meta di kuminsá un estudio di Beibel? Ki dia tabata e último biaha ku bo a demostrá na e promé bishita kon un estudio di Beibel ta bai? Bo ta kòrda e último biaha ku bo a ofresé un estudio di Beibel na e hendenan ku ta riba bo ruta di revista? Bo a mustra bo kolega di trabou, kompañero di skol, bisiña, famia i otro konosí e vidionan: Dikon Analisá Loke Beibel Ta Bisa? i Kon un Kurso di Beibel Ta Bai? Ora bo ta usa e stènt di literatura, bo ta hasi esfuerso pa informá e persona ku kue un publikashon di estudio ku e por haña un estudio di Beibel grátis?
3. Kiko nos mester pa siña hende e bèrdat na un manera efikas?
3 Yudansa di Yehova i Hesus: Ora Hesus a duna e mandamentu di ‘hasi disipel,’ el a usa e palabra “bai.” Asina el a indiká ku nos mester hasi esfuerso i tuma inisiativa. Pero, e no a laga nos pa nos kuenta, ma a primintí ku lo e ta ku nos. (Mat. 28:19, 20) Ademas, Yehova ta duna nos tantu su spiritu komo e hèrmèntnan i e entrenamentu ku nos mester pa siña hende e bèrdat. (Zak. 4:6; 2 Kor. 4:7) Nos por pidi Yehova pa duna nos “tantu e deseo komo e poder” pa partisipá den e trabou importante akí.—Flp. 2:13.
4. Dikon nos mester sigui enfoká riba e trabou di hasi disipel?
4 Nos ta haña masha goso ora nos prediká e bon notisia. Sinembargo, nos goso ta oumentá mas ora nos siña un hende e bèrdat i yud’é djòin nos riba e kaminda “ku ta hiba na bida.” (Mat. 7:14; 1 Tes. 2:19, 20) Mas importante ainda, ora nos ta sigui enfoká riba e trabou di hasi disipel nos ta agradá Yehova kende “no ta deseá pa ningun hende ser destruí, ma . . . pa tur haña chèns di arepentí.”—2 Ped. 3:9.