Kon pa Mehorá Nos Sirbishi: Ofresé e Buki Beibel Ta Siña

Dikon Esaki Ta Importante: E buki Beibel Ta Siña ta un di e hèrmèntnan prinsipal ku nos ta usa pa siña hende. Sinembargo, pa nos por us’é pa studia ku un persona, nos tin ku ofresé e buki promé. P’esei, nos tur tin ku hasi esfuerso pa bira ábil den ofresé e buki Beibel Ta Siña den sirbishi. (Pro. 22:29) Tin diferente manera pa hasi esei i publikadónan tin ku skohe e método ku ta duna nan mihó resultado.

Kon pa Hasié:

Hasi un pregunta ku ta lanta interes di e persona i ku bo por usa pa dirigí su atenshon na un kapítulo di e buki. Bo por asta usa un di e preguntanan ku tin na kuminsamentu di kada kapítulo. Despues ku e persona kontestá e pregunta, lesa un teksto di Beibel ku ta pas ku e tema ku boso ta papiando di dje. Kaba, mustr’é un paragraf ku tin di haber ku e tema i kisas analis’é brevemente kuné.
Usa e preguntanan ku tin riba e páginanan di introdukshon pa lanta interes di e persona i despues mustr’é den e buki unda e por haña e kontesta ku Beibel ta duna. Por ehèmpel, bo por menshoná un tragedia ku resientemente tabata den notisia i splik’é ku hopi hende ke sa e kontesta pa e preguntanan na página 3. Òf bo por bisa ku bo ta bishitando bo bisiñanan pa kompartí un punto di bista positivo tokante futuro ku nan. Anto, mustr’é e plachinan na página 4 i 5 i puntr’é: “Kua di e promesanan akí abo lo ke mira kumpli?” Un otro manera ta di bisa ku bo ta bishitando hende brevemente pa yuda nan haña kontesta pa e preguntanan di mas importante den bida. Kaba, mustr’é e preguntanan ku tin na página 6 i puntr’é kua e ta haña mas interesante.
Usa e método direkto pa kuminsá un estudio di Beibel. Bo por bisa: “Nos ta ofresé nos bisiñanan e buki akí pa yuda nan studia Beibel. Bo konos’é? [Permití e persona kontestá.] Si bo tin un par di minüt, lo mi por mustrá bo kon bo por us’é pa studia bo Beibel.”

Purba di Hasi Esaki den e Luna Akí:

Tene seshonnan di práktika durante bo Adorashon Komo Famia.
Ora bo ta den sirbishi ku otro publikadó, bis’é ki presentashon bo ta bai usa. (Pro. 27:17) Si bo presentashon no ta duna bon resultado, kambi’é.