Kon pa Kuminsá Estudio di Beibel Kaminda Nos A Laga Revista
1 Riba djasabra generalmente nos ta ofresé E Toren di Vigilansia i ¡Despertad! den sirbishi. Sin embargo, esaki ta simplemente e promé paso pa alkansá nos meta di siña e bèrdat na hende di kurason sinsero. Den e paragrafnan ku ta sigui tin algun sugerensia kon pa laga e buki Beibel Ta Siña ora nos hasi rebishita kaminda nos a laga revista, i kon pa kuminsá un estudio di Beibel. Podisé bo tin ku adaptá nan na bo teritorio i usa bo mes palabra. Sinti bo liber pa usa un otro presentashon si e ta duna bon resultado.
2 Usa e Páginanan di Introdukshon: Ora bo bolbe lo bo por bisa: “E revistanan ku mi a laga serka bo ta dirigí nos atenshon na Beibel. Wak dikon ta asina importante pa lesa Beibel.” Lesa Isaias 48:17, 18; Juan 17:3; òf un otro teksto di Beibel apropiá. Anto despues ku bo mustra e doño di kas e buki Beibel Ta Siña i a dun’é un ehemplar, bo por sigui asin’aki:
◼ “Beibel ta duna nos un berdadero speransa pa futuro.” Mustra e doño di kas página 4-5 i puntr’é: “Kua di e promesanan aki bo tin gana di mira kumpli?” Dirigí e doño di kas na e kapítulo ku ta konsiderá e promesa bíbliko ku el a skohe i trata brevemente un òf dos paragraf kuné si e permití esei.
◼ Òf lo bo por bisa: “Beibel ta kontestá e preguntanan di mas importante di bida.” Mustra e doño di kas página 6 i puntr’é si el a yega di hasi su mes un di e preguntanan na pia dje página. Bai na e kapítulo ku ta kontestá e pregunta ku ta interes’é, i konsiderá brevemente un òf dos paragraf.
◼ Òf bo por resaltá algun di e títulonan riba e página di kontenido i puntr’é kua di e tópikonan aki ta interes’é. Bai na e kapítulo ei i duna un demostrashon kòrtiku di un estudio di Beibel.
3 Laga un Pregunta na e Promé Bishita: Un otro opshon ta pa pone e base pa un rebishita na e promé bishita. Despues ku e doño di kas aseptá e revistanan, hasié un pregunta i primintié ku lo bo kontest’é na e siguiente bishita. Purba hasi un areglo definitivo pa bolbe bèk, i hasi sigur di kumpli ku bo afsprak. (Mat. 5:37) Ora bo bai bèk, kòrda e doño di kas riba e pregunta; anto lesa i konsiderá brevemente e kontesta for di e buki Beibel Ta Siña. Dun’é un ehemplar pa e por sigui e konsiderashon. At’akí algun ehèmpel:
◼ Si e revista ku bo a laga ta trata e kondishonnan di mundu ku ta empeorando, lo bo por bisa: “E siguiente biaha nos por konsiderá e kontesta ku Beibel ta duna riba e pregunta: Ki kambionan Dios lo trese riba tera?” Ora bo bai bèk, usa página 4-5. Òf lo bo por hasi e pregunta: “Tur tragedia ta Dios su boluntat?” Ora bo rebishitá e persona, mustr’é paragraf 7-8 den kapítulo 1.
◼ Si e revista ku bo a laga ta trata bida di famia, promé ku bo bai bo por hasi e pregunta aki: “Kiko kada miembro di famia por hasi pa e bida di famia por ta mas felis?” Ora bo bai bèk konsiderá paragraf 4 den kapítulo 14.
◼ Si e revista ku bo a laga ta trata konfiabilidat Beibel, lo bo por laga e pregunta aki pa e siguiente bishita: “Beibel ta kuadra ku siensia?” Ora bo hasi e rebishita, konsiderá paragraf 8 den kapítulo 2.
4 Na final di kada konsiderashon, hasi un otro pregunta pa bo kontestá na e siguiente bishita. Unabes e estudio ta tuma lugá riba un base regular, konsiderá e buki sistemátikamente for di kuminsamentu te final. Pero kiko si e doño di kas no aseptá e buki Beibel Ta Siña? Tòg bo por sigui hiba revista p’e i kòmbersá riba temanan bíbliko kuné. Segun ku bo ta kultivá su interes, ku tempu lo e por aseptá un estudio di Beibel.
5 E Toren di Vigilansia i ¡Despertad! por stimulá un hende su deseo di haña sa kiko Beibel ta siña realmente. P’esei, hasi un esfuerso spesial pa kuminsá estudionan di Beibel ku esnan ku aseptá e revistanan. Di e manera aki nos lo obedesé Hesus su instrukshon pa ‘hasi hende disipel i siña nan.’—Mat. 28:19, 20.
[Study Questions]
1. Kiko ta nos meta ora nos laga revista?
2. Kon nos por usa e páginanan di introdukshon den e buki Beibel Ta Siña pa kuminsá un estudio di Beibel?
3. Kon nos por kuminsá un estudio di Beibel despues ku nos a laga revista ku ta trata (a) kondishonnan di mundu ku ta empeorando? (b) bida di famia? (c) konfiabilidat di Beibel?
4. Kiko nos mester hasi si e doño di kas no aseptá e buki Beibel Ta Siña?
5. Dikon nos mester purba hasi mas ku djis laga revista serka e hendenan?