Usa Bo Ruta di Revista pa Kuminsá Estudio di Beibel
1. Dikon Yehova su organisashon a bin ta animá nos pa hopi tempu kaba pa tin un ruta di revista?
1 Hopi hende no ta interesá den studia Beibel ku nos, pero nan ta gusta lesa nos revistanan sí. P’esei, pa hopi tempu kaba Yehova su organisashon a bin ta animá nos pa tin un ruta di revista. Ora hende ta lesa nos revistanan ku regularidat, hopi biaha nan ta krea un anhelo pa e Palabra di Dios. (1 Ped. 2:2) Ku tempu, nan por lesa algu ku ta lanta nan interes i motivá nan pa aseptá un estudio di Beibel.
2. Kon nos por kultivá interes di e hendenan ku nos tin riba nos ruta di revista?
2 ‘Muha’ e Simianan di e Bèrdat: En bes di djis laga e revistanan i bira bai, kòmbersá ku e persona i purba di sera un laso di amistat kuné. Esaki lo yuda bo konosé su sirkunstansia-, interes- i kreensianan, pa asina bo por yud’é mihó. (Pro. 16:23) Prepará pa kada bishita. Si ta posibel, resaltá brevemente un punto interesante i un teksto bíbliko ku tin den e revista. Asina, tiki tiki nos ta muha e simianan di e bèrdat ku tin den su kurason. (1 Kor. 3:6) Despues di kada bishita, nota e fecha, e literatura ku bo a laga i tambe e tema i teksto ku boso a konsiderá.
3. Ku ki frekuensia nos mester bolbe bishitá esnan ku nos tin riba nos ruta di revista?
3 Ku Ki Frekuensia Bo Mester Bolbe? Bo tin ku bolbe un biaha pa luna pa entregá e último revistanan na esnan ku ta riba bo ruta. Sinembargo, dependiendo di bo sirkunstansianan i interes dje persona, bo por opta pa bishit’é ku mas frekuensia. Por ehèmpel, un òf dos siman despues di a laga e revistanan, bo por bolbe i bisa: “Mi a pasa un ratu asina pa mustra bo un punto for di e revistanan ku mi a laga pa bo.” Esaki lo habri e persona su apetit pa lesa un artíkulo en partikular. Si el a les’é kaba, bo por puntr’é kiko e ta pensa di e artíkulo i papia brevemente riba dje. Òf si e persona ta gusta lesa nos literatura, bo por bolbe i ofres’é sea e tratado, foyeto òf buki ku nos tin komo oferta e luna ei.
4. Kiko nos por hasi de bes en kuando pa haña sa si esnan ku nos tin riba nos ruta di revista ta interesá pa studia Beibel?
4 No warda pa e persona pidi bo un estudio di Beibel. Abo mes tuma e inisiativa. Asta si el a nenga un estudio di Beibel den pasado, de bes en kuando bo por usa e artíkulo “Pregunta Ku Beibel Ta Kontestá” di E Toren di Vigilansia i wak si e ke analis’é ku bo. Kisas bo por kuminsá un estudio na porta mes. Pero, si bo no logra kuminsá un estudio, bo por sigui hiba e revistanan p’e pa kultivá su interes.