“Sembrando Simia di Reino” cu un Ruta di Revista
1 Cantica 133 den Canta Alabanza na Jehova ta titulá “Sembrando Simia di Reino.” E ta basá riba Jesus su ilustracion cu ta compará e trabou di haci disipel cu e sembramentu di simia. (Mat. 13:4-8, 19-23) E letranan dje cantica ta bisa: “Ma cuanto simia ta bai florecé/Por dependé di bo, mashá.” Con nos por bira mas eficas den nos ministerio? Un manera ta dor di establecé i mantené un ruta di revista.
2 Nos por logra vários cos cu un ruta di revista. (1) Bishitanan regular cada dos siman ta haci posibel pa bo desaroyá un relacion amical cu e persona interesá. (2) Bo ta soru cu e persona ei tin un suministro regular dje informacion salbador-di-bida cu tin den E Toren di Vigilancia i Spierta! (3) Mediante bo combersacionnan bo por yuda e persona desaroyá un anhelo pa berdad bíblico, loke por hiba na un studio di Bijbel.—1 Ped. 2:2.
3 Con pa Cuminsá un Ruta di Revista: Ki ora cu un persona mustra interes den e revistanan, splik’é cu den cada edicion tin artículonan sobresaliente i cu gustosamente lo bo trece nan p’e cada dos siman. Despues cu bo bai, skirbi e persona su nomber i adres, e fecha dje bishita, e fecha dje edicionnan cu bo a laga, e artículo cu bo a resaltá i e temanan cu mas a interesá e persona.
4 Bo por cuminsá un ruta cu djis un par di hende. Anto haci esfuerso pa aument’é dor di agregá otro hendenan cu bo ta laga revista cuné. Segun bo ruta ta crece, bo por organis’é geográficamente di manera cu lo ta mas fácil pa cubrié. Tene un registro exacto di cua edicion bo a laga na cada bishita i ki dia. Haci un nota di loke bo a combersá i con pa sigui desaroyá e persona su interes den e berdad n’e siguiente bishita.
5 Incluí Hende Profesional i di Negoshi: Experencia ta mustra cu doñonan di negoshi i otro hende profesional tin hopi chens di aceptá nos revistanan riba un base regular. Un anciano tabatin asta e alcalde di su pueblo como su ruta di revista. Un publicadó a cuminsá un studio cu un homber di 80 aña, doño di un compania di material di construccion, despues cu e tabatin dies aña stret ta hiba e revistanan p’e!
6 Un ruman muher pionero a drenta un pacus i a topa un pareha cu no a ricibié masha caluroso. Pero, como cu nan a aceptá e revistanan, el a dicidí di agregá e pareha na su ruta di revista. Cu tempu, e ruman muher kier a stop di bishitá nan pasobra nan tabata asina antipático i nunca no tabatin nada di bisa, ni ora el a pidi nan punto di bista riba algu. Pero e ruman muher a haci oracion tocante e asuntu i cu tempu a laga e buki Biba pa semper cu e pareha. Despues di les’é, e esposa a sclama: “Por fin, mi a haña e berdad!” A cuminsá un studio di Bijbel cu nan i despues e pareha a bautisá. E perseverancia dje pionero en berdad a producí bon fruta.
7 Ora di Haci e Rebishitanan: Ora bo ricibí un revista nobo, lesa tur artículo. Busca puntonan cu lo atraé cada persona di bo ruta. Anto ora bo bolbe bek cerca nan, bo por bisa: “Ora mi tabata lesa e artículo aki, mi a pensa riba bo i con kisas lo e interesá bo.” Publicadónan di tur edad por disfrutá di tin un ruta di revista. Asta un mucha chikitu por bisa: “Mi ta contentu di mira señora atrobe. Señora su revistanan nobo di E Toren di Vigilancia i Spierta! a yega. Mi ta kere cu señora lo gusta e artículo aki titulá . . .”
8 Lanta anticipacion pa artículonan binidero dor di hala atencion na e cuadro titulá “Den Nos Siguiente Edicion.” Ora tin artículonan cu ta un seri, indicá esaki i animá e lector pa no perde ningun di nan. No lubidá cu cada biaha cu bo entregá e revistanan na un persona cu ta parti di bo ruta di revista, bo por conta un rebishita. I riba tur cos, corda cu bo meta ta pa un dia cuminsá un studio di Bijbel cu e personanan aki.
9 Bishitá Hende di Bo Ruta Riba un Base Regular: Bo por cubri bo ruta di revista na cualkier ora cu ta práctico: un dia den siman, parti atardi, anochi trempan of den fin di siman despues di a traha un poco den e trabou di cas-pa-cas. Si bo no por cubri bo ruta debí cu bo ta malu of afó cu vakansi, pidi un otro publicadó den bo famia of den congregacion pa entregá e revistanan pa bo. Den e manera ei, e hendenan di bo ruta lo no keda sin haña nan revistanan na tempu.
10 Un manera pa sembra simia di Reino ta dor di hiba E Toren di Vigilancia i Spierta! regularmente na tur esnan di bo ruta di revista. Segun bo ta siña nan berdad bíblico, nan por capta e sentido dje palabra di Reino i cu tempu producí fruta di Reino huntu cu bo.—Mat. 13:8, 23.