Kon pa Mehorá Nos Sirbishi: Kultivá Interes di e Personanan Riba Bo Ruta di Revista

Dikon E Ta Importante: Hopi hende gusta lesa nos revistanan pero nan no ke studia Beibel ku nos. Kisas nan ta satisfecho ku nan religion òf nan ta pensa ku nan no tin tempu pa studia. Sinembargo, segun ku nan regularmente ta lesa e revistanan, nan por krea un anhelo pa e Palabra di Dios. (1 Ped. 2:2) Kisas sierto artíkulo por lanta nan interes òf nan sirkunstansianan por kambia. Bishitanan breve i regular por yuda nos sa kiko ta interesá i preokupá nan, i nan por haña mas konfiansa ku nos. Ku tempu, kisas nos por kuminsá un estudio di Beibel ku nan.

Kon pa Hasié:

Traha tempu tur luna pa hiba e edishonnan resien di E Toren di Vigilansia i ¡Despertad! pa e persona. Kisas bo por bishit’é na un otro okashon durante e luna pa anim’é lesa un artíkulo di e revistanan ku bo a dun’é òf pa laga e publikashon ku nos tin komo oferta e luna ei. Hasi anotashon.—Wak Nos Ministerio di Reino di yanüari 2014, pág. 3.
Prepará pa kada bishita. Na lugá di djis duna e persona e revista anto bai, purba di kòmbersá kuné i sea amigabel. Asina ta bira mas fásil pa bo kultivá su interes.
Sea atento na oportunidatnan pa kuminsá un estudio. Si un persona riba bo ruta puntra bo kiko Beibel ta bisa tokante un sierto tema, trese un publikashon di estudio p’e ku ta kontestá su pregunta i analis’é huntu. Promé ku bo bai, hasi un pregunta relashoná ku e tema anto trat’é na e siguiente bishita. Si boso ta kòmbersá riba un base regular i sistemátiko usando Beibel òf un di nos publikashonnan di estudio, bo a kuminsá un estudio di Beibel. Bo a ofresé e persona e foyeto Bon Notisia i a mustr’é kon e por studia Beibel den un par di minüt? Bo a mustr’é e vidionan Dikon Analisá Loke Beibel Ta Bisa? i Kiko un Kurso di Beibel Ta Enserá? Asta si e persona a yega di bisa bo ku e no ke studia, su sirkunstansianan por kambia. P’esei, dikon bo no ta bolbe purba atrobe?

Purba di Hasi Esaki e Luna Akí:

Traha un lista di tur persona ku bo por kuminsá un ruta di revista kuné. Ofresé nan e edishon resien di e revistanan i bisa nan ku lo bo trese e siguiente edishon pa nan.