Scoge Artículonan cu Ta Apelá n’e Interesnan Specífico di Hende

¹ Mescos cu tiradónan di flecha cu ta mik nan flecha cuidadosamente, hopi publicadó di congregacion i pionero ta disfrutando di excelente éxito dor di usa artículonan selectá for di E Toren di Vigilancia i Spierta! pa apelá n’e interesnan specífico di hende den nan teritorio. E rumannan ta determiná ken muy probablemente lo kier lesa cierto artículonan dje revistanan. Con nan ta haci esaki?

² Promé nan ta lesa cada edicion di kaft pa kaft. Despues nan ta puntra nan mes: Ki tipo di persona cada artículo lo atraé? E ora ei nan ta haci esfuerso pa bishitá individuonan cu probablemente lo ta interesá den lesa e artículo ei. Ora nan ta verwagt cu un cierto edicion probablemente lo ricibí un bon acohida den nan teritorio, nan ta bestel un cantidad extra.

³ Nos Revistanan Ta Masha Respetá: Un di nos abonadonan cu ta traha pa e revista internacional mas lesá di Nigeria, a bisa tocante Spierta!: “Pabien pa e mihó revista di interes general na mundu.” Un lector ferviente di nos revistanan a comentá: “Ki hoyanan di sabiduria di balor incalculabel! Ta difícil pa mi pensa riba un tema cu ta interesá mi, cu no a ser analisá den e páginanan di algun dje [revistanan] aki.”

⁴ E revistanan ta trata cu un variedad amplio di tema, incluso e Bijbel, sucesonan mundial, asuntunan di famia, problemanan social, historia, ciencia, flora i fauna, djis pa mencioná algun. Sigur un persona ta mas incliná na lesa algu ora esei tin di haber cu su necesidadnan, circunstancianan of profesion. Como cu nos ta papia cu hopi individuo, cada un cu su mes preferencia i problemanan particular, ta masha eficas pa scoge artículonan pa atraé specíficamente e personanan cu nos ta topa.

⁵ Tuma nota kico a sosodé ora dos Testigo a ofrecé e Spierta! di 8 di september, 1996, na un columnista di korant. El a skirbi: “Promé cu mi tabatin chens di bisa cu mi no tabata interesá, un di nan a agregá: ‘Tin un artículo tocante indjannan mericano. Nos sa cu bo a skirbi hopi tocante e tópico aki.’ ” El a tuma e revista i, durante desayuno, a lesa e informacion tocante indjan, admitiendo despues cu “e tabata excelente” i “masha onesto.”

⁶ Kico Ta Interesá Hende den Bo Teritorio? Kico bo a mira den e revistanan den lunanan recien cu por atraé interes di doñonan di pacus i hende profesional den bo teritorio of di bo bisiñanan, coleganan di trabou i compañeronan di scol? Kico lo ta di interes particular pa abogado, educadó, consehero di famia i di scol, consehero di hóbennan, trahadó di servicionan social i profesionalnan den ramo di salubridad? Teniendo na mente e tipo di hendenan na ken bo ta predicá ora bo ta analisá cada edicion lo duná bo excelente maneranan pa plama e palabra dje berdad.

⁷ Ora bo topa un persona cu mustra interes special den un cierto artículo dje Toren di Vigilancia of Spierta! i ta aceptá e revista, lo bo por bisa: “Si den un futuro edicion tin un artículo cu mi ta kere lo interesá bo, gustosamente lo mi trece un ehemplar pa bo.” Lo bo por agregá e persona na bo ruta di revista, bolbiendo bek regularmente cu e revistanan mas recien. Ta mescos cu loke nos ta haci ora nos haña un invitacion habrí pa rebishitá personanan cu kisas ta specialmente interesá den cierto artículonan cu ta aparecé den nos revistanan.

⁸ Tene un Meta Spiritual: Un par di aña pasá, un homber interesá pa logra un bon carera, a haña un revista Spierta! riba un tema cu a interes’é. Sin embargo, e homber religioso aki a lesa tambe e edicion di E Toren di Vigilancia cu a bin huntu cu e Spierta! E tabatin un artículo cu a impuls’é pa examiná loke el a kere henter su bida tocante Trinidad. Seis luna despues el a bautisá! P’esei, no vacilá pa enbolbé lectornan di nos revistanan den consideracionnan bíblico. Lo bo por introducí e foyeto Kico Dios Ta Rekerí di Nos? i ofrecé pa tuma djis un par di minuut pa considerá un les cada biaha cu bo bolbe bek pa trece revista nobo.

⁹ Determiná cuidadosamente ken entre bo rebishitanan i contactonan di negoshi muy probablemente lo apreciá di ricibí e edicionnan coriente di E Toren di Vigilancia i Spierta! Anto haci un esfuerso sincero pa alcansá nan. Ofrecé mas tantu hende posibel e revistanan balioso aki. I nunca lubidá cu, segun cu bo ta haci esfuerso pa yuda mas hende lesa nos revistanan, bo ta ‘mandando bo pan riba e superficie di awa.’ Cu tempu, bo por tin éxito den haña futuro disipelnan nobo.—Ecl. 11:1, 6.