Kico Ta Bo Plannan p’e Lunanan di Juli cu Augustus?
1 No ta berdad cu nos tin mas chens di logra nos metanan excelente ora nos programá e mihó manera pa usa e tempu cu nos tin disponibel? Temporada di vakansi grandi ta duna nos hopi oportunidad pa promové interesnan teocrático. (Pro. 21:5) Cua ta algun di nan?
2 E Congreso “Dios Su Caminda di Bida” ta un evento cu nos tur tin cu incluí den nos plannan. Haci areglo pa ta liber di trabou i di scol di manera cu lo bo ta presente pa cada dia dje congreso. Si bo tin cu biaha pa yega, haci reservacion pa bo hospedahe i biahe hopi tempu di antemano.
3 Pakico no planea pa aumentá bo actividad di sirbishi di veld durante e lunanan di juli cu augustus? Tal bes bo por dedicá mas tempu den e trabou di predicá. Vakansi di scol ta duna hóbennan e oportunidad di traha pionero auxiliar durante un of mas dje lunanan di vakansi. Otronan tambe por planea di antemano pa traha pionero auxiliar den augustus, ya cu lo tin cincu fin di siman completo. Augustus binidero, ora nos ta cera nos aña di sirbishi, nos lo haci un esfuerso uní pa tur hende participá mas plenamente posibel den e ministerio.
4 Bo ta planea pa yuda un congregacion cercano cu tin mester di yudansa pa cubri su teritorio? E superintendente di circuito por informá e ancianonan tocante e necesidadnan den bo área. Si bo ta bai afó cu vakansi, planea pa asistí n’e reunionnan i participá den sirbishi di veld cu e congregacion caminda bo ta bai. Si bo bai bishitá famianan cu no ta Testigo di Jehova, prepará di antemano maneranan cu lo bo por compartí e berdad cu nan.
5 Kico ta bo plannan pa juli cu augustus? Sin duda lo bo kier refrescá bo mes físicamente. Pero no pasa por haltu dje oportunidadnan mas importante cu tin pa vigorisá bo mes spiritualmente dor di sigui pone e Reino na promé lugá den bo bida.—Mat. 6:33; Efe. 5:15, 16.