Bo Ta Lesa e Revistanan?
1 Un pareha misionero na Africa a bisa di nos revistanan: “E Toren di Vigilancia ta yuda nos keda spiritualmente alerto den nos teritorio. Nos ta saca animacion i fortalesa for di cada edicion.” Abo tin e mésun aprecio profundo pa nos revistanan? I bo ta mésun ansioso pa lesa nan?
2 Ta tuma bastante tempu pa prepará artículonan p’e revistanan cu por ser lesá den djis un par di minuut. Sabiendo esaki, lo bo djis pasa ariba-riba dor dje artículonan, wak e plachinan of de bes en cuando lesa un artículo cu pa casualidad ta hala bo atencion? Nos ta sabí si nos ta haci mas cu esei. Nos mester tuma tempu pa lesa i analisá tur e artículonan den cada edicion di nos revistanan. E Toren di Vigilancia ta nos revista principal di alimento spiritual oportuno. Spierta! ta contené artículonan interesante i informativo riba un variedad di tema. Loke nos ta siña dor di lesa e revistanan aki no solamente ta fortalecé nos spiritualmente, sino tambe ta prepará nos pa un participacion mas eficas den e ministerio. Si nos mes ta lesa e revistanan fielmente, nos lo ta entusiasmá pa ofrecé nan na otronan.
3 Con pa Mehorá Nos Custumbernan di Lesa: Bo tin cu mehorá den keda al dia cu bo lesamentu dje revistanan? Ata aki dos sugerencia cu ta duna resultado pa hopi ruman. (1) Traha un programa regular pa lesa. Djis apartá 10 pa 15 minuut tur dia pa lesa, i lo bo keda sorprendí con hopi bo por lesa den un siman. (2) Haci un manera pa bo sa kico bo a lesa caba. Kisas bo por pone un V na cuminsamentu di cada artículo cu bo a lesa. Si no, lo bo por salta algun artículo of asta henter un revista. Ta importante pa crea un rutina cu ta bon pa bo i pega na dje.—Compará cu Filipensenan 3:16.
4 “E esclabo fiel i discreto” a respondé sabiamente na nos tempu yen di cambio, dor di publicá artículonan cu ta trata cu e berdadero necesidadnan di hende. (Mat. 24:45) Di berdad, e revistanan tin un efecto riba nos bida. Con lihé nos ta progresá spiritualmente ta dependé, pa un gran parti, di e calidad di nos custumbernan di lesamentu teocrático. Pa esnan cu ta traha tempu pa lesa tur e revistanan, tin un bendicion spiritual ricu ta spera nan.