Edishon Spesial di ¡Despertad! pa Ofresé den Novèmber!
1 Hopi hende tin pregunta sinsero tokante e balor di Beibel. Si ta hende a skirbié, dikon nos por yam’é e Palabra di Dios? Ki motibu mi tin pa konfia Beibel i lag’é dirigí mi pasonan? Ki benefisio mi ta saka si mi tuma tempu i hasi esfuerso pa lesa i studia Beibel? Kua tradukshon di Beibel mi mester usa? Esakinan ta algun di e preguntanan ku ta haña kontesta den e edishon spesial di ¡Despertad! di novèmber, titulá “Bo Por Konfia Beibel?”
2 Nos ke distribuí e edishon spesial aki di ¡Despertad! den henter nos teritorio. Si ta posibel, durante e luna di novèmber, sali tur djasabra den sirbishi di kas pa kas huntu ku e kongregashon. Mustra e edishon di ¡Despertad! aki na bo famia-, bisiña-, kompañeronan di trabou, maestro-, koleganan di skol i rebishitanan. Ora bo ta biaha òf ta hasi kompra, bai ku algun ehemplar huntu ku bo. E ansianonan a hasi pedido pa mas ehemplar di e revista aki pa asina e kongregashon por tin sufisiente pa laga.
3 Kuminsá un Estudio di Beibel: Ora bo laga e revista, bo por pone e base pa un estudio di Beibel promé ku bo terminá bo kòmbersashon. Por ehèmpel, lo bo por bisa: “E siguiente biaha, lo mi tin gana di mustra bo e kontesta ku Beibel ta duna pa e pregunta aki: ‘Kiko Ta Dios Su Propósito pa e Tera?’ ” Despues bai bèk ku e buki Beibel Ta Siña i mustra e doño di kas página 4-5, òf konsiderá paragraf 1-3 di kapítulo 3. Un otro opshon ta pa bisa: “Mi tin gana di bini bèk un otro dia pa konsiderá un profesia di Beibel ku ta kumpliendo aworakí.” Ora bo bolbe, mustra e doño di kas kapítulo 9 di e buki i konsiderá huntu kuné paragraf 1-3. Òf bo por simplemente bis’é: “Hopi hende tin difikultat pa komprondé loke nan ta lesa den Beibel. Otro biaha, lo mi tin gana di mustra bo kon bo por komprondé bo Beibel mihó.” Ora bo hasi e rebishita, introdusí e buki Beibel Ta Siña, i duna un demostrashon di un estudio di Beibel.
4 Ta Beibel so ta kontené “skrituranan santu” ku por duna nos “e sabiduria ku ta hiba na salbashon.” (2 Tim. 3:15) P’esei anto, laga nos tur partisipá ku selo den e trabou pa distribuí e edishon spesial aki di ¡Despertad! pa yuda hende haña konfiansa den Beibel!