Un Edishon Spesial di ¡Despertad! pa Presentá den Sèptèmber
1 Kasi tur hende ta gusta tende paranan kanta i atmirá e bahada di solo. Sin embargo, hopi hende no ta rekonosé ku ta un Tata selestial amoroso a krea e kosnan aki. Wèl, pa medio di un edishon spesial di ¡Despertad! nos lo haña un oportunidat úniko pa mustra ku Yehova ta e Kreadó di tur kos. (Isa. 40:28; 43:10) Henter e edishon di sèptèmber ta trata e tópiko “Ta Eksistí un Kreadó?”
2 Den Teritorio: Si ta posibel, regla bo asuntunan pa bo por sali tur djasabra den sirbishi di kas pa kas huntu ku e kongregashon. Klaru ku bo por ofresé e edishon spesial aki otro dianan di siman tambe. Spesialmente maestronan i otro personanan ku ta traha den edukashon lo mester ta interesá den e edishon aki. P’esei, lo por hasi areglonan spesial pa bishitá e personanan ei den boso teritorio.
3 Si un persona mustra interes, hasié un pregunta ku lo bo kontestá na e siguiente bishita. Por ehèmpel, lo bo por puntr’é dikon un Kreadó amoroso ta permití asina tantu sufrimentu. Despues na e siguiente bishita, lo bo por hala atenshon na kapítulo 1 òf 11 di e buki Beibel Ta Siña. Òf bo por skohe pa hasi un pregunta tokante e Kreadó su propósito pa e tera, i despues konsiderá kapítulo 3 ora bo bolbe.
4 Na Skol: Si bo ta bayendo skol, pakiko no regalá bo maestro- i koleganan di klas e ¡Despertad! spesial aki? Kisas si bo djis pone un ehemplar riba bo lèsenar, esaki por impulsá otronan pa hasi pregunta tokante nos kreensianan. Podisé lo bo haña oportunidat pa usa informashon for di dje pa defendé bo fe durante spreekbeurt i ora bo ta traha verslag. Pa yuda bo, e rúbrika “Hóbennan Sa Puntra” den e edishon aki tin e tema “Kon Mi Por Defendé Mi Fe den Kreashon?”
5 Yehova meresé onor i gloria pa loke el a krea. (Rev. 4:11) Nos por onra nos Kreadó i yuda otro hende hasi meskos dor di ofresé e ¡Despertad! di sèptèmber ku entusiasmo.