Kon Nos Mester Usa Ehèmpel di Presentashon pa Sirbishi?

Desde yanüari 2018, tin ehèmpel di presentashon pa sirbishi riba e portada di Material i Tarea pa Reunion Nos Bida i Sirbishi Kristian. Kon nos mester usa nan?

Ora di Duna Parti: Bo mester usa e pregunta, teksto i base pa rebishita di e ehèmpel di presentashon pa sirbishi. Sinembargo, esaki no ta nifiká ku bo mester ripití palabra pa palabra loke tin den e vidio di e ehèmpel di presentashon pa sirbishi. Por ehèmpel, bo por usa otro situashon, introdukshon òf rasonamentu. Tambe bo por ofresé un publikashon for di nos Kaha di Hèrmènt pa Siña Hende e Bèrdat, asta si e instrukshonnan no ta menshoná esei.

Ora di Prediká: E ehèmpel di presentashon pa sirbishi ta duna nos idea práktiko ku nos por usa den sirbishi. Si un persona mustra interes sinsero i ke sa mas, bo por sigui kòmbersá ku e persona, kisas usando informashon for di e ehèmpel di presentashon pa hasi rebishita. Bo por adaptá e ehèmpel di presentashon pa sirbishi òf usa un otro presentashon. Kisas un tópiko di e ehèmpel di presentashon pa sirbishi di un luna anterior òf un otro teksto lo interesá e hendenan den bo teritorio mas? E hendenan kaminda bo ta biba ta mas interesá den un suseso ku a pasa resientemente òf algu ku tabata den notisia? Bo por usa e ehèmpelnan di presentashon pa sirbishi na diferente manera. Pero, no lubidá ku bo meta mester ta pa ‘hasi tur kos pa kousa di e bon notisia, pa bo por kompartié ku otro hende.’—1Ko 9:22, 23.