Buskuchi pa Mi Kachónan
NICK, ku ta biba na Oregon, Merka, a skirbi lo siguiente: “Den lènte di 2014 mi a kuminsá kana ku mi dos kachó chikitunan den stat kaminda mi ta biba. Semper mi tabata mira e Testigunan pará banda di nan garoshi di literatura. Tur ora, nan tabata nèchi bistí i tabata smail i kumindá hendenan ku tabata pasa.
E Testigunan no tabata amabel ku hende so pero ku mi kachónan tambe. Un dia Elaine, kende tabata na e garoshi a duna mi dos kachónan buskuchi. Despues di esei, mi kachónan tur ora tabata ranka pa bai tuma buskuchi serka e Testigunan.
Esei a keda sosodé pa un par di luna. I ami tabata gusta kòmbersá un ratu asina ku e Testigunan. Pero mi no tabata kòmbersá largu ku nan. Mi tabatin mas ku 70 aña anto mi no tabata sa bon bon kiko nan ta kere aden. Anto mirando ku mi a keda desapuntá tempu ku mi tabata bai misa protestant, mi a pensa ku e mihó kos ta pa mi studia Beibel riba mi mes.
Durante e tempu ei mi a mira otro Testigu pará banda di nan garoshi na diferente lugá den stat. Nan tambe tabata masha amigabel. Nan semper tabata kontestá mi preguntanan for di Beibel i esei a pone ku mi a haña mas konfiansa den nan.
Un dia Eliane a puntra mi: ‘Bo ta kere ku bestia ta regalo di Dios?’ Mi a kontest’é ku ‘sí, mi ta kere esei.’ E ora ei, el a lesa Isaías 11:6-9 pa mi. Djei pa dilanti mi tabata ke sa mas tokante di Beibel, pero mi no tabata tuma nada di lesa sí nò.
Den e dianan ku a sigui mi tabatin kòmbersashonnan interesante ku Elaine i su kasá, Brent. Nan a sugerí mi pa lesa Mateo te Echonan pa mi komprondé kiko ke men ta un berdadero kristian. Pues, mi a hasié. No a dura mashá ku mi a kuminsá studia Beibel ku Brent i Elaine. Esei tabata na zomer di 2016.
Tur siman mi tabata anhelá pa mi estudio i e reunionnan na Salòn di Reino. Mi a sinti mi masha kontentu di por a siña loke Beibel realmente ta bisa. Mas ku un aña despues, mi a batisá i bira Testigu di Yehova. Awor mi tin 79 aña i mi sa ku mi ta riba e bon kaminda. I Yehova a bendishoná mi i a yuda mi bira parti di su famia mundial.”