3 | Ehèmpel di Personahe Bíbliko

BEIBEL TA PAPIA DI . . . Hende hòmber i hende muhé fiel ku tabatin “e mesun sintimentunan ku nos.”—SANTIAGO 5:17.

Kiko Esei Ta Nifiká?

Beibel ta yen di relato di bida real di hende hòmber i hende muhé ku a lucha ku nan emoshonnan. Segun ku nos ta lesa tokante nan, nos por nota ku tin di nan tabata sinti meskos ku nos.

Kon Esei Por Yuda?

Nos tur ke pa hende komprondé kon nos ta sinti. Pero esaki ta mas importante ainda ora nos ta lucha ku problema di salú mental. Ora nos lesa Beibel, nos por siña tokante personahe bíbliko ku a pensa i sinti meskos ku nos. Komo resultado, nos lo ripará ku no ta nos so tin ku lucha ku ansiedat i emoshon negativo; e ora ei, nos lo no sinti ku nos ta nos so mas.

Den Beibel tin vários ekspreshon di hende ku tabata den un situashon ku nan no por a kambia i ku a laga nan sinti nan desesperá. Bo a yega di sinti ku ‘awor sí bo no por mas’? Moises, Elías i David a yega di sinti asina.—Numbernan 11:14; 1 Reinan 19:4; Salmo 55:4.
Beibel ta konta di un hende muhé ku yama Ana, kende “tabata kibrá” pasobra e no por a haña yu i e otro esposa di su kasá tabata tèr e sin fin.—1 Sámuèl 1:6, 10.
Beibel ta papia di un hòmber ku yama Yòb ku kisas tabatin algun sintimentu meskos ku nos. Aunke ku e tabatin fe fuerte den Yehova, el a pasa den situashon difísil ku a pone ku e mester a lucha ku su emoshonnan. El a bisa: “Mi ta odia mi bida; mi no ke sigui biba.”—Yòb 7:16.

Ora nos siña kon e personahenan bíbliko akí a trata ku pensamentu negativo, nos tambe por haña e forsa ku nos tin mester pa trata ku nos difikultatnan.

Kon Beibel Ta Yudando Kevin

Kon Trastorno Bipolar Ta Afektá Mi

“Tempu ku mi tabatin kasi 50 aña, mi a ser diagnostiká ku trastorno bipolar. Tin biaha mi ta sinti ku mi por vense kualke problema ku presentá den mi bida. Pero otro biaha mi ta sinti ku no ta bale la pena pa sigui biba.”

Kon Beibel Ta Yuda Mi

“Un personahe di Beibel ku mi por identifiká mi mes kuné ta Apòstel Pedro. El a kometé eror ku a lag’é sinti ku e no ta bal nada. Pero en bes di sigui pensa asina, Pedro a purba di ta rònt di amigu ku ta interesá den dje. Riba e dianan ku mi ta sinti mi hopi malu pa motibu di mi trastorno bipolar, mi mes imperfekshonnan por bira demasiado pa mi trata kuné i nan por pone mi sinti ku mi no ta bal nada. Meskos ku Pedro, mi a siña ku ta importante pa mi keda pegá na mi amigunan ku ke yuda mi pa mi no entregá.

Un personahe di Beibel ku ta konsolá mi mashá ta Rei David. Hopi bes, e tabata sintié deprimí pa motibu di e situashon ku e tabata aden, i e tabata sintié malu pa motibu di e erornan ku el a kometé den pasado. Tin biaha mi por identifiká mi mes kuné pasobra mi tambe ta bisa òf hasi kos ku despues mi ta lamentá. E palabranan di David na Salmo 51 ta konsolá mi. Na versíkulo 3, David a bisa: ‘Mi sa ku mi a hasi malu, i mi piká ta semper mi dilanti.’ Asina mi ta sinti ora mi ta hopi deprimí, pasobra ta difísil pa mi pensa na un manera positivo tokante mi mes. Pero mi ta identifiká mi mes tambe ku David su palabranan na versíkulo 10: ‘O Dios, duna mi un kurason puru, i kambia mi manera di pensa pa mi por keda fiel.’ Mi tambe sa roga Yehova pa yuda mi kambia e punto di bista negativo ku mi tin di mi mes. Por último, versíkulo 17 ta konsolá mi. E ta bisa: ‘O Dios, lo bo no rechasá un kurason kibrá i arepentí.’ E versíkulo akí ta sigurá mi ku Dios ta stima mi.

Ora mi enfoká riba e ehèmpelnan di personahe bíbliko i loke Dios a duna mi te ku awor, mi speransa pa futuro ta bira mas fuerte. E promesanan di Beibel ta bira real pa mi i esei ta yuda mi perseverá.”