2 | “Konsuelo for di e Skritura”

BEIBEL TA BISA: “Tur loke a ser skirbí anteriormente a ser skirbí pa nos instrukshon, pa asina mediante nos perseveransia i e konsuelo for di e Skritura nos por tin speransa.”—ROMANONAN 15:4.

Kiko Esei Ta Nifiká?

Den Beibel tin teksto ku ta konsolá nos i ku por duna nos e forsa ku nos tin mester pa trata ku pensamentu negativo. Ademas, Beibel ta sigurá nos ku pronto nos lo no tin ku lucha ku nos emoshonnan mas.

Kon Esei Por Yuda?

Nos tur por sinti nos tristu de bes en kuando, pero hende ku ta sufri di depreshon òf ansiedat por sinti nan tristu konstantemente. Kon Beibel por yuda nos?

Beibel por yuda nos kambia nos pensamentunan negativo pa pensamentunan positivo. (Filipensenan 4:8) E por yena nos mente ku pensamentu ku ta konsolá nos i trankilisá nos i ku por yuda nos dominá nos emoshonnan.—Salmo 94:18, 19.
Beibel por yuda nos stòp di pensa ku nos no ta bal nada.—Lukas 12:6, 7.
Tin hopi relato den Beibel ku ta sigurá nos ku nos no ta nos so i ku Dios, nos Kreador, ta komprondé nos sintimentunan kompletamente.—Salmo 34:18; 1 Huan 3:19, 20.
Beibel ta primintí ku Dios lo kita tur rekuerdo di ántes ku ta kousa nos doló. (Isaías 65:17; Revelashon 21:4) Ora nos ta luchando ku nos pensamentu- i emoshonnan, e promesa akí por duna nos e forsa ku nos tin mester pa perseverá.

Kon Beibel Ta Yudando Jessica

Kon Depreshon Ta Afektá Mi

“Tempu ku mi tabatin 25 aña, mi a bira asina malu emoshonalmente ku mi no por a funshoná, i mi a ser diagnostiká ku depreshon severo. E rekuerdo di kosnan doloroso ku mi a eksperensiá den pasado tabata keda tormentá mi. Dòkter a yuda mi komprondé ku mi depreshon tabata debí na pensamentu negativo ku tabata bini di e kosnan doloroso ku a pasa ku mi den pasado. Ademas di tuma remedi apropiá, mi mester a bai terapia pa asina mi por a identifiká pensamentu negativo i siña kon pa korigí nan.”

Kon Beibel Ta Yuda Mi

“Durante e tempu ku mi tabata hopi deprimí, mi tabata haña atake di pániko, ansiedat severo i mi no por a drumi. Anochi, hopi bes mi tabata sinti ku mi pensamentunan negativo tabata dominá mi. Manera Salmo 94:19 ta splika, Dios por konsolá i trankilisá nos ora ansiedat ta dominá nos. Pues, mi tabatin mi Beibel i un skref ku teksto animante banda di mi kama. Ora mi no por a drumi, mi tabata lesa algun versíkulo di Beibel pa asina Dios su pensamentunan por a konsolá mi.

Beibel ta animá nos pa bringa kontra pensamentu ku ta kontrali na Dios su manera di pensa. Den pasado, mi tabata konvensí ku mi no tabata bal nada, ku ningun hende no por a stima mi i ku mi no tabata sirbi pa nada. Pero mi a siña ku e tipo di pensamentunan ei ta kontrali na loke Beibel ta bisa. Pasobra Beibel ta bisa ku Dios ta un Tata amoroso i miserikòrdioso ku ta interesá den kada un di nos. Ku tempu, mi a siña dominá mi pensamentunan en bes di laga mi pensamentunan dominá mi. Mi a siña mira mi mes manera Dios ta mira mi. Esaki tabata un paso importante pa asina mi por a kambia e punto di bista negativo ku mi tabatin di mi mes.

Mi ta ansioso pa e tempu yega ora ku tur rekuerdo doloroso di pasado i pensamentu negativo lo disparsé. Mi sa ku den futuro lo no tin problema di salú mental mas. Esei ta yuda mi trata ku mi limitashonnan awor, i ta duna mi un bunita speransa pa futuro, unda por fin mi bataya kontra depreshon lo yega na su fin.”