Kon Guera i Konflikto Lo Kaba?

DIOS LO KABA KU GOBIÈRNU HUMANO

Dios lo kaba ku gobièrnu humano na e guera ku Beibel ta yama Armagedon.a (Revelashon 16:16) Na e tempu ei, “e reinan di henter e tera habitá” lo reuní huntu pa “e guera ku lo tuma lugá riba e gran dia di Dios, e Todopoderoso.” (Revelashon 16:14) Despues di Armagedon, lo no tin guera nunka mas na mundu.

Dios lo remplasá gobièrnu humano ku su Reino, òf gobièrnu, ku lo goberná for di shelu. Dios su gobièrnu nunka lo ser destruí. (Dánièl 2:44) Dios a skohe su Yu, Hesukristu, pa ta Rei di e gobièrnu ei. (Isaías 9:​6, 7; Mateo 28:18) Ta e gobièrnu ei ta e Reinob ku Hesus a siña su siguidónan pa pidi p’e den orashon. (Mateo 6:​9, 10) Tur hende lo biba bou di un solo gobièrnu, i nan lo tin Hesus komo nan Gobernante.

Kontrali na gobernante humano, Hesus lo no usa su poder i outoridat pa su propio interes. Hesus ta hustu i imparsial. P’esei, niun hende lo no mester preokupá ku nan lo ser neglishá òf tratá inhustamente debí na nan rasa, nashonalidat òf kultura. (Isaías 11:​3, 4) Tampoko hende lo no tin mester di bringa pa nan derechonan. Dikon nò? Pasobra Hesus lo sòru pa tur hende por biba bon. Beibel ta bisa: “Lo e libra hende pober ku ta sklama pa yudansa; lo e libra hende oprimí i hende ku no tin niun persona pa yuda nan. . . . Lo e libra nan for di opreshon i violensia.”—Salmo 72:​12-14.

E Reino di Dios lo eliminá tur arma na mundu. (Mikéas 4:3) Ademas, lo e kaba ku hende malbado ku no ke stòp di bringa i hende ku ta hasi daño na otro hende. (Salmo 37:​9, 10) Tur kaminda na mundu, hende hòmber, hende muhé i mucha lo sinti nan trankil i protehá.—Ezekiel 34:28.

Bou di Dios su gobièrnu, tur hende lo disfrutá di un mihó bida. Dios su gobernashon lo kaba ku tur problema ku ta kousa guera, manera pobresa, hamber i falta di lugá di biba. Tur hende lo haña abundansia di kuminda nutritivo i nan lo tin un bon lugá pa biba.—Salmo 72:16; Isaías 65:​21-23.

E Reino di Dios lo drecha tur e dañonan ku guera a kousa. Lo e no drecha daño físiko so, pero tambe kualke problema mental òf daño emoshonal ku un persona tin debí na e kosnan horibel ku el a eksperensiá durante guera. Asta hende ku a pèrdè nan bida lo ser resusitá bèk aki riba tera. (Isaías 25:8; 26:19; 35:​5, 6) Famia lo topa otro atrobe; i nan lo no kòrda mes mas riba tur e kosnan malu di pasado, pasobra “e kosnan ku tabata pasa ántes no t’ei mas.”—Revelashon 21:4.

DIOS LO ELIMINÁ PIKÁ

Bou di e Reino di Dios, tur hende lo adorá e úniko Dios berdadero, Yehova.c E ta “e Dios di amor i di pas.” (2 Korintionan 13:11) Hende lo siña kon pa biba na pas ku otro. (Isaías 2:​3, 4; 11:9) Tur hende ku apliká loke nan siña lo bira perfekto, i nan lo no tin piká mas.—Romanonan 8:​20, 21.

DIOS LO KABA KU SATANAS I E DEMOÑONAN

Dios lo kaba ku Satanas i e demoñonan, kendenan ta influensiá hende pa bringa kontra otro. (Revelashon 20:​1-3, 10) Sin e mal influensia di Satanas i e demoñonan, “lo tin pas tur kaminda.”—Salmo 72:7.

Bo por tin sigur ku loke Dios a primintí, esta, ku lo e kaba ku guera i violensia, lo bira realidat. Dios tin tantu e deseo komo e abilidat i kapasidat pa kaba ku guera.

• Dios ta sabí i e tin poder. P’esei, e sa kon pa kaba ku guera i violensia. (Yòb 9:4) Nada no ta imposibel pa Dios hasi.—Yòb 42:2.

• Dios no ta gusta mira hende sufri. (Isaías 63:9) Ademas, e ta “odia tur hende ku ta stima violensia.”—Salmo 11:5.

• Dios semper ta kumpli ku loke e primintí; e no por gaña.—Isaías 55:​10, 11; Tito 1:2.