“E Bataya Akí Ta di Yehova”

Na 1999, e gobièrnu di Fransia a bisa ku e sukursal di Fransia mester paga belasting riba e donashonnan ku nan a risibí entre aña 1993 i 1996. Nos no a haña un huisio hustu den e kortenan na Fransia. Despues ku nos a pèrdè e kaso den korte di apelashon, e gobièrnu di Fransia a konfiská mas ku kuater mion i mei euro for di e kuenta di banko di e sukursal na Fransia. E úniko manera pa nos haña nos plaka bèk tabata di hiba e kaso Korte Europeo. Pero promé ku Korte Europeo a trata nos kaso, nan a bisa nos pa reuní ku e abogadonan di e gobièrnu di Fransia i ku un representante di e Korte Europeo pa wak si nos por a yega na un akuerdo promé ku e kaso ser tratá.

Nos a pensa ku e representante di korte lo a bai preshoná nos pa paga un parti di e montante ku e gobièrnu di Fransia a eksigí pa nos paga. Sinembargo, nos tabata konvensí, a base di prinsipio di Beibel, ku Yehova lo no aprobá pa nos duna nan ni sikiera parti di e plaka ei. E rumannan su donashonnan tabata pa apoyá e interesnan di e Reino. Pues, nan donashonnan no por a bai pa gobièrnu. (Mat. 22:21) Tòg, nos a bai e reunion pa mustra rèspèt pa e reglanan di Korte Europeo.

Nos a reuní den un di e salanan di korte, un sala masha bunita. E oudiensia no a kuminsá bon. Manera ku e reunion a kuminsá, e representante di Korte Europeo a bisa ku Testigunan di Yehova tin ku paga parti di e plaka ku e gobièrnu franses ta pidi. Spiritu santu a motivá nos pa puntr’é: “Bo tabata sa ku e gobièrnu franses ya a konfiská mas ku kuater mion i mei euro for di nos kuenta di banko?”

E representante a shòk. Su punto di bista relashoná ku e kaso a kambia kompletamente ora ku e abogadonan di gobièrnu a konfirmá ku nan a konfiská tur e plaka ei. El a zundra nan i kaba e reunion mesora. Mi a realisá ku Yehova, na un manera ku nos no a pensa, a kambia tur kos pa asina nos gana e kaso. Nos a keda masha sorprendí pa loke a pasa, i nos a sali hopi kontentu mes for di e reunion.

Riba 30 di yüni di 2011, Korte Europeo a tuma un desishon unánime na nos fabor. Nan a bisa ku e belasting tabata ilegal, i nan a manda e gobièrnu paga nos tur e plaka bèk, plùs interes! E veredikto históriko akí ta protehá adorashon berdadero na Fransia, te ku awe. E pregunta ku nos a hasi, sin ku nos a prepará di antemano p’e, tabata manera e piedra ku a mata Góliat. Esei a kambia e desishon final di e kaso. Dikon nos a gana? Pasobra, manera David a bisa Góliat: “E bataya akí ta di Yehova.”—1 Sám. 17:​45-47.

Esaki no tabata e úniko biaha ku nos a gana un kaso legal. Apesar ku durante historia, vários gobièrnu ku hopi poder i vários religion a oponé Testigunan di Yehova, tòg nos a gana 1.225 kaso den e kortenan supremo na 70 pais, i tambe den vários korte internashonal. E viktorianan legal akí ta protehá nos derechonan básiko, manera, ser rekonosé ofisialmente komo un religion, nos derechonan pa por prediká, pa nenga di partisipá den seremonia patriótiko i pa nenga transfushon di sanger.

Kon bini mi tabata enbolbí den un kaso legal na Europa siendo ku mi ta sirbi na e sede mundial di Testigunan di Yehova na Merka?

MI A SER LANTÁ PA MAYORNAN KU TABATA MISIONERO

Mi mayornan, George ku Lucille, a gradua for di e di 12 klas di Gálad. Mi a nase na aña 1956 tempu ku mi mayornan tabata sirbi na Etiopia. Nan a yama mi Philip, manera e predikadó di bon notisia di promé siglo. (Echo. 21:8) Na 1957, e gobièrnu di Etiopia a prohibí nos di sirbi Yehova. Aunke mi tabata hopi chikitu, te ainda mi ta kòrda bon bon kon mi famia tabata adorá Yehova den skondí. Komo mucha, mi tabata pensa ku esei ta masha eksitante. Lamentablemente, na 1960, e gobièrnu a obligá nos bandoná e pais.

Nos famia a muda bai na Wichita, Kansas, na Merka. Pero mi mayornan a sigui prediká ku e mesun entusiasmo ku tempu ku nan tabata misionero. Nan a pone un bon ehèmpel pa ami i mi rumannan. Nan a siña tantu ami, komo mi ruman mas grandi, Judy, i mi ruman mas chikitu, Leslie, kendenan tambe a nase na Etiopia, pa stima Yehova i pa sirbié di henter nos kurason. Mi a batisá ku 13 aña. Tres aña despues, mi famia a bai sirbi kaminda tabatin mas nesesidat di predikadó, na Arequipa, Perú.

Na 1974 ora mi tabatin 18 aña di edat, e sukursal di Perú a asigná ami huntu ku kuater otro ruman hòmber pa sirbi komo pionero spesial. Nos a ser asigná na un teritorio ku nunka a ser prediká promé. E teritorio tabata keda haltu den e serunan di Andes. Nos mester a prediká na e hendenan ku ta papia e idiomanan quechua i aymara. Nos tabata biaha den un kas móbil ku nos tabata yama The Ark, pasobra e tabata parse un kaha. Mi tin dushi rekuerdo ora mi pensa bèk kon nos tabata mustra e hendenan indígena for di Beibel ku Yehova pronto lo kaba ku pobresa, malesa i morto. (Rev. 21:​3, 4) Hopi di e hendenan ei a bira sirbidó di Yehova.

MI A KUMINSÁ SIRBI NA E SEDE MUNDIAL

Na aña 1977, Ruman Albert Schroeder, ku tabata un miembro di Kuerpo Gobernante di Testigunan di Yehova, a bishitá Perú. Durante e bishita ei, el a animá mi pa apliká pa e sirbishi di Bètel na e sede mundial. I mi a hasi esei. Poko tempu despues, riba 17 di yüni di 1977, mi a kuminsá sirbi na Bètel, na Brooklyn. Durante e promé kuater añanan mi a sirbi den e departamento di limpiesa i di mantenshon.

Na yüni 1978, na un kongreso internashonal na New Orleans, na Louisiana, mi a konosé Elizabeth Avallone. Elizabeth a ser lantá pa mayornan ku meskos ku di mi, tabata stima Yehova ku henter nan kurason. Tempu ku mi a konosé Elizabeth e tabatin kuater aña sirbiendo komo pionero regular, i e tabata ke sigui sirbi Yehova pa restu di su bida den e sirbishi di tempu kompleto. Nos a keda den kontakto ku otro. Nos a siña konosé otro mas mihó i nos a bin stima otro. Nos a kasa dia 20 di òktober di aña 1979, i nos a kuminsá sirbi na Bètel huntu.

E rumannan den nos promé kongregashon na Brooklyn Spanish tabata masha amoroso. Durante e añanan ku a sigui, nos a sirbi den tres otro kongregashon ku tambe a mustra nos hopi amor i ku a animá nos pa sigui sirbi na Bètel. Nos tin hopi apresio pa e yudansa i apoyo ku nos famianan i amigunan a duna nos ora ku nos mayornan a bira mas grandi i tabatin mester di yudansa.

MI TRABOU DEN E DEPARTAMENTO LEGAL

Pa mi sorpresa, na yanüari 1982, mi a ser asigná na e Departamento Legal, na Bètel. Tres aña despues, komo parti di mi asignashon, e rumannan a pidi mi pa sigui un estudio na universidat pa bira abogado. Mi a keda sorprendí ora ku mi a haña sa ku hende na Merka i otro pais tin e derecho básiko di libertat pa hasi hopi kos debí na e vários viktorianan legal ku Testigunan di Yehova a optené. Nan a resaltá hopi di e kasonan importante akí den klas.

Na 1986, ora ku mi tabatin 30 aña di edat, mi a ser asigná komo e superintendente di e Departamento Legal. Mi tabata kontentu ku Bètel a konfia mi ku asina tantu responsabilidat apesar ku mi tabata yòn. Mi a sinti mi hopi nèrvioso, pasobra tabatin hopi kos ku mi no tabata sa, i mi tabata konsiente ku esaki lo no bai ta un asignashon fásil.

Na aña 1988, mi a bira abogado. Pero mi no a realisá kuantu e estudio akí a afektá mi spiritualidat. Estudio avansá por nutri e deseo pa pusha bo mes pa bai dilanti den bida i pa sinti ku bo ta mihó ku otro hende ku no tin mesun edukashon. Elizabeth a salba mi. El a yuda mi establesé e rutina spiritual ku mi tabatin promé ku mi a bai universidat. Ku tempu, pokopoko mi a rekuperá spiritualmente. For di eksperensia mi por bisa ku un kabes yen di konosementu no ta e kos di mas importante den bida. Loke ta duna bida berdadero balor ta di stima Yehova i tin un amistat será kuné i tambe stima su pueblo.

DEFENDÉ BON NOTISIA I ESTABLESÉ E DERECHO LEGAL DI PREDIKÁ

Despues ku mi a kaba universidat, mi a yuda nos departamento atendé ku e aspektonan legal ku Bètel tin mester i defendé e interesnan di e Reino den korte. Mi trabou tabatin su desafionan, pero, e tabata interesante tambe mirando e kambionan rápido ku tabata tuma lugá den Yehova su organisashon. Por ehèmpel, nos tabata pidi kontribushon pa nos literatura. Pero kuminsando na aña 1990 a pidi e Departamento Legal pa duna informashon i rekomendashon kon pa stòp ku pidimentu di kontribushon. Mas despues, Testigunan di Yehova a stòp di pidi kontribushon pa literatura. Esaki a simplifiká e trabounan na Bètel i pa e teritorionan, i te ku dia di awe e desishon akí ta yuda nos evitá problema ku asuntu di pagamentu di belasting. Algun persona a pensa ku e kambio akí lo a afektá e organisashon finansieramente i ku lo el a stroba nos di tin sufisiente literatura pa e trabou di prediká. Pero nèt lo kontrario a sosodé. E kantidat di hende ku ta sirbi Yehova desde 1990 a bira mas ku dòbel, i awe tur hende tin akseso na literatura basá riba Beibel, sin ku nan mester paga pa esakinan. Mi a mira ku e kambionan grandi den nos organisashon a resultá eksitoso, danki na e yudansa di Yehova i e guia ku nos ta haña di e esklabo fiel.—Éks. 15:2; Mat. 24:45.

E kasonan ku nos ta gana den korte no ta djis pasobra nos tin bon abogado. Hopi biaha, loke ta pone Hues i Gobièrnu aktua na nos fabor ta e bon kondukta di e pueblo di Yehova. Mi a mira un ehèmpel di esei na aña 1998, ora ku tres miembro di Kuerpo Gobernante i nan esposanan a asistí na un kongreso spesial na Cuba. Nan manera respetuoso i bondadoso a pisa mas ku e reunionnan formal ku nan tabatin ku gobièrnu tokante nos neutralidat den asuntu polítiko.

Sinembargo, tin biaha e úniko manera pa korigí un inhustisia, ta di bai korte pa ‘defendé bon notisia i establesé derecho legal di predik’é.’ (Flp. 1:7) Por ehèmpel, pa hopi aña e outoridatnan na Europa i Sur Korea no a rekonosé nos derecho di nenga di drenta servisio militar. Komo resultado, mas o ménos 18.000 ruman hòmber na Europa i mas ku 19.000 ruman hòmber na Sur Korea a bai prizòn debí ku nan a nenga a base di nan konsenshi di drenta servisio militar.

Finalmente, riba 7 di yüli di 2011, Korte Europeo a dikta e sentensia históriko di Bayatyan kontra Armenia ku ta obligá tur pais na Europa pa permití servisio sivil pa tur hende ku nenga servisio militar debí na nan kreensianan religioso. Riba 28 di yüni di 2018, e korte di Sur Korea a tuma un desishon similar. E dos viktorianan ei lo no tabata posibel si solamente un par di nos ruman hòmbernan yòn so a keda neutral den e asuntu di servisio militar.

E Departamento Legal na sede mundial i esnan di e sukursalnan rònt mundu ta trahando duru pa defendé nos derechonan di adorá Yehova i di por prediká bon notisia di Reino. Ta un onor pa nos representá nos rumannan ku ta enfrentá oposishon di gobièrnu. Asta si nos no gana un kaso den korte, nos ta duna un bon testimonio na e gobièrnunan, na reinan i na e nashonnan. (Mat. 10:18) Nos ta sita teksto di Beibel ora nos ta den korte i tambe den nos dokumentonan skirbí. Esei mes ta un testimonio pa e huesnan, e representantenan di gobièrnu, e reporteronan i e públiko en general. Hende sinsero ta haña sa, ku Testigunan di Yehova ta basa nan kreensianan riba Beibel. Algun di e personanan akí a bira nos rumannan.

DANKI YEHOVA!

Durante e último 40 añanan, mi tabatin e privilegio di por a traha huntu ku otro sukursal rònt mundu riba asuntu legal. Mi a presentá dilanti vários korte supremo i tambe dilanti di hende ku posishon haltu den gobièrnu. Mi tin masha apresio pa mi koleganan den e Departamento Legal na sede mundial i tambe pa e otro koleganan den e departamentonan legal rònt mundu. Mi ta sinti ku mi tabatin hopi bendishon den mi bida i ku mi tin un bida ku propósito.

Durante e último 45 añanan, Elizabeth semper a apoyá mi ku hopi amor den tempu bon i den tempu malu. Mi tin hopi apresio p’e, pasobra apesar di su malesa ku ta pone ku e no tin masha forsa, tòg e ta keda apoyá mi.

Di eksperensia, nos a mira ku nos forsa i viktoria no ta debí na nos propio abilidatnan. Manera David a bisa: “Yehova ta duna forsa na su pueblo.” (Sal. 28:8) En bèrdat, “e bataya akí ta di Yehova.”