“Kere den Hesus” Ta Sufisiente pa Haña Salbashon?

Loke Beibel ta bisa

Hende ku ta kristian ta kere ku Hesus a muri pa e pikánan di tur hende. (1 Pedro 3:18) Sinembargo, pa un hende haña salbashon, mas ta enserá ku djis kere den Hesus komo Salbador. E demoñonan tambe ta kere ku Hesus ta “Yu di Dios,” pero nan lo no ser salbá, sino destruí.—Lukas 4:41; Hudas 6.

• Kiko mi mester hasi pa haña salbashon?

• Mi por haña salbashon si mi resa e “orashon di pekadó”?

• Kiko ta orígen di “e orashon di pekadó”?

Kiko mi mester hasi pa haña salbashon?

• Kere ku Hesus a sakrifiká su bida pa nos pikánan. (Echonan 16:30, 31; 1 Huan 2:2) Esei ta inkluí kere ku Hesus realmente a eksistí i ku tur loke Beibel ta bisa tokante dje ta bèrdat.

• Analisá loke Beibel realmente ta siña. (2 Timoteo 3:15) Beibel ta menshoná ku Apòstel Pablo i Sílas a bisa e wardadó di prezu: ‘Kere den Señor Hesus i lo bo haña salbashon.’ Mas despues, nan a kuminsá siña e wardadó di prezu “palabra di Yehova.”a (Echonan 16:31, 32) Esaki ta mustra ku pa e wardadó di prezu por a kere den Hesus, e mester tabatin konosementu básiko di Palabra di Dios. E mester a haña konosementu eksakto di Skritura.—1 Timoteo 2:3, 4.

• Arepentí. (Echonan 3:19) Ademas, bo mester arepentí òf sinti duele profundo di e kosnan robes ku bo a yega di pensa i hasi den pasado. Bo ta mustra ku bo a arepentí di bèrdat ora otro hende por mira bon kla ku bo a stòp di hasi loke ta malu den bista di Dios i awor ta hasi ‘obra ku ta mustra arepentimentu.’—Echonan 26:20.

• Batisá. (Mateo 28:19) Hesus a bisa ku hende ku ke bira su disipel mester batisá. E wardadó di prezu menshoná anteriormente a batisá pa e por a bira disipel di Hesus. (Echonan 16:33) Di mes manera, despues ku Apòstel Pedro a siña e multitut e bèrdat tokante Hesus, “esnan ku di kurason a aseptá su palabra a batisá.”—Echonan 2:40, 41.

• Obedesé e mandamentunan di Hesus. (Hebreonan 5:9) Hende ku ‘siña kumpli ku tur loke Hesus a manda’ ta demostrá ku nan ta su siguidónan den nan manera di biba. (Mateo 28:20) Nan ta bira “hende ku ta kumpli ku e palabra ei, i no hende ku ta tend’é so.”—Santiago 1:22.

• Perseverá te na fin. (Marko 13:13) Hesus su disipelnan “mester di perseveransia” pa nan por ser salbá. (Hebreonan 10:36) Por ehèmpel, Apòstel Pablo a sigui obedesé e siñansanan di Hesus i el a keda leal na Dios; Pablo a sigui hasi esei for di dia ku el a bira siguidó di Kristu te na su morto.—1 Korintionan 9:27.

Mi por haña salbashon si mi resa e “orashon di pekadó”?

Den algun religion, hende sa hasi sierto orashon manera e “orashon di pekadó” i e “orashon di salbashon.” Por lo general, e hendenan ei ta rekonosé ku nan ta pekadó i ta kere ku Hesus a muri pa nan pikánan. Nan ta hasi orashon na Hesus pa Hesus ta den nan kurason òf bida. Pero, Beibel no ta menshoná ni rekomendá pa resa e “orashon di pekadó.”

Algun hende ta kere ku despues ku nan resa e “orashon di pekadó” sigur nan lo haña salbashon. Pero, no tin niun orashon ku por garantisá salbashon. Komo hende imperfekto, nos ta sigui kometé eror. (1 Huan 1:8) P’esei, Hesus a siña su siguidónan hasi orashon regularmente pa nan haña pordon pa nan pikánan. Ademas, algun siguidó di Kristu ku tabatin e speransa di haña salbashon eterno a pèrdè e speransa ei, pasobra nan a kai for di fe òf a bira lomba pa Dios.—Hebreonan 6:4-6; 2 Pedro 2:20, 21.

Kiko ta orígen di e “orashon di pekadó”?

E historiadónan no ta di akuerdo ku otro tokante orígen di e “orashon di pekadó.” Algun di nan ta bisa ku e tradishon ei a kuminsá durante e Reformashon Protestant. Otro historiadó ta kere ku hende a kuminsá resa e “orashon di pekadó” durante e reformanan religioso di siglo 18 i 19 despues di Kristu. Sea kual sea e kaso, Skritura no ta apoyá e kustumber akí; de echo, e ta kontrali na e siñansanan di Beibel.