Hesus rondoná pa hende di diferente nashonalidat

Kon Hesus Ta Salba Nos?

Loke Beibel ta bisa

Hesus a salba hende fiel ora el a duna su bida komo un sakrifisio di reskate. (Mateo 20:28) P’esei, Beibel ta yama Hesus e “Salbador di mundu.” (1 Huan 4:14) Beibel ta bisa tambe: “No tin salbashon den ningun otro persona, pasobra no tin ningun otro nòmber bou di shelu ku Dios a duna hende pa medio di kua nos por ser salbá.”—Echonan 4:12.

Hesus a “eksperensiá morto pa tur hende” ku pone fe den dje. (Hebreonan 2:9; Huan 3:16) Despues, “Dios a lant’é for di morto”, i Hesus a bolbe shelu komo un kriatura spiritual. (Echonan 3:15) Einan, Hesus “por salba e hendenan ku ta aserká Dios pa medio di dje, pasobra semper e ta na bida pa boga pa nan.”—Hebreonan 7:25.

Dikon Hesus mester boga pa nos?

Nos tur ta pekadó. (Romanonan 3:23) Piká ta krea un barera entre nos i Dios, i e ta hiba na morto. (Romanonan 6:23) Pero Hesus a fungi komo e “persona ku ta boga pa” tur hende ku pone fe den su sakrifisio di reskate. (1 Huan 2:1, nota) E ta boga pa nan, i e ta pidi Dios pa skucha nan orashonnan i pordoná nan pikánan pa medio di e sakrifisio ku el a hasi pa nan. (Mateo 1:21; Romanonan 8:34) Dios ta skucha e petishonnan ei di Hesus pasobra nan ta na armonia ku su boluntat. Dios a manda Hesus na tera “pa salba mundu pa medio di dje.”—Huan 3:17.

Djis kere den Hesus ta sufisiente pa ser salbá?

Nò. Aunke nos mester kere den Hesus pa haña salbashon, esei no ta e úniko kos ku nos mester hasi. (Echonan 16:30, 31) Beibel ta bisa: “Meskos ku kurpa sin spiritu ta morto, asina tambe fe sin obra ta morto.” (Santiago 2:26) Pa nos ser salbá, nos mester:

Siña tokante Hesus i su Tata Yehova.—Huan 17:3.
Pone fe den nan.—Huan 12:44; 14:1.
Obedesé nan mandamentunan pa demostrá nos fe. (Lukas 6:46; 1 Huan 2:17) Hesus a bisa ku no ta tur hende ku yam’é “Señor” lo ser salbá pero solamente esnan ku “ta hasi e boluntat di [su] Tata ku ta den shelu.”—Mateo 7:21.
Sigui demostrá nos fe apesar di difikultat. Hesus a laga nos komprondé esei ora el a bisa: “Esun ku perseverá te na fin ta esun ku lo ser salbá.”—Mateo 24:13.