LOKE HÓBEN SA PUNTRA

Kiko Mi Por Hasi si Mi A Kibra un Regla di Kas?

Kasi tur famia tin regla. Por ehèmpel, ki ora pa yega kas, kuantu tempu mag usa telefòn òf tablet i kon pa mustra bon manera.

Kiko bo por hasi si bo a faya ku un regla di bo mayornan? Bo no por kambia loke a pasa, pero loke sí bo por hasi ta sòru pa kos no bira pió. Ban wak algun bon konseho.

Loke bo no mester hasi

Si bo mayornan no sa ku bo a kibra un regla, lo bo por pensa pa skonde loke bo a hasi.
Si nan sa ku bo a kibra un regla, lo bo por pensa pa bini ku èksküs òf kulpa otro hende.

Ningun di e kosnan ei no ta bon pa hasi. Dikon nò? Pasobra skonde kos òf bini ku èksküs ta indiká ku bo falta madures. Esei ta laga bo mayornan sa ku bo tin hopi kos di siña ainda.

“Nunka no ta bon pa gaña, pasobra e bèrdat semper ta sali na kla. Anto, lo bo por haña mas straf ku si bo a bisa bo mayornan e bèrdat mesora.”—Diana.

Loke ta mihó pa hasi

Djis bisa loke bo a hasi. Beibel ta bisa: “Un hende ku ta skonde su pikánan lo no tin éksito.” (Proverbionan 28:13) Bo mayornan sa ku bo no ta perfekto, pero nan ke pa bo ta onesto sí.

“Si bo bisa bo mayornan e bèrdat, nan lo tene mas kompashon ku bo i nan lo haña mas konfiansa den bo.”—Olivia.
Pidi despensa. Beibel ta bisa: “Bisti humildat.” (1 Pedro 5:5) Bo mester ta humilde. Pidi despensa i no bini ku èksküs.

“Hende ku tin kustumber di bini ku èksküs ora nan hasi algu malu, ta daña nan konsenshi tikitiki, i ku tempu nan konsenshi lo no molestiá nan mas.”—Heather.
Aseptá ku tin konsekuensia. Beibel ta bisa: “Hasi kaso ora boso haña disiplina.” (Proverbionan 8:33, wak e nota.) Aseptá kualke straf ku bo haña sin keha.

“Mas bo keha, mas pió kos ta bira. Lo ta mihó pa bo aseptá e straf, i no enfoká riba loke bo no gusta di bo straf.”—Jason.
Gana konfiansa di bo mayornan bèk. Beibel ta bisa: “Boso mester kita e personalidat bieu, ku ta di akuerdo ku boso komportashon di ántes.” (Efesionan 4:22) Si bo mayornan mira ku bo ta hasi bo bèst pa tuma bon desishon, nan lo konfia bo atrobe.

“Si bo sòru pa tuma bon desishon i mustra bo mayornan ku bo no ta hasi e mesun fout mas, ku tempu nan lo konfia bo atrobe.”—Karen.

TEP: Hasi asta mas di loke nan ta pidi di bo pa mustra ku nan por konfia bo. Por ehèmpel, e siguiente biaha ku bo sali ku bo amigunan, laga bo mayornan sa ora bo ta na kaminda pa kas, asta si bo no ta lat. Esaki lo yuda nan komprondé ku bo ke pa nan konfia bo atrobe.