Di Bèrdat Mundial di Futbòl Por Uni Hende?—Kiko Beibel Ta Bisa?

Hende ta ferwagt ku mas o ménos 5 mil mion persona lo wak Mundial di Futbòl FIFA. E evento akí ta tuma lugá entre 20 di novèmber te ku 18 di desèmber 2022. Hopi hende ta pensa ku e tipo di eventonan deportivo akí por hasi hopi pa yuda e hendenan ku ta wak e eventonan akí bira mas uní.

• “Deporte por kambia mundu; e por inspirá hende. No tin hopi kos ku por uni hende manera deporte.”—Nelson Mandela, eks presidente di Suráfrika.

• “Futbòl . . . por uni hende, pasobra tur hende lo tin mesun speransa, goso, pashon i amor. I e ta trese hende di vários kultura huntu.”—Gianni Infantino, presidente di FIFA.a

Mundial di Futbòl, of kualke otro evento deportivo, por yuda hende bira mas uní? Ta posibel pa hende ta uní i disfrutá di pas?

Mundial di Futbòl por uni hende?

Durante Mundial di Futbòl di e aña akí, hende no a papia òf pensa solamente tokante futbòl. E mundial akí a pone hende papia tokante vários tópiko sosial i polítiko, entre otro, derecho humano, diskriminashon rasial i e diferensia grandi entre hende riku i pober.

Fuera di esei, hopi hende ta disfrutá di wak e tipo di eventonan deportivo akí. Anto hopi di nan ta deseá pa e eventonan akí yuda hende bira mas uní. Pero, en realidat, e eventonan akí no por yuda hende keda uní. Mas bien, aktitut di hende i nan komportashon na e eventonan akí ta mustra bon kla kon dividí e mundu akí ta. Esei ta kuadra ku e manera ku Beibel ta deskribí e tempu ku nos ta biba aden, esta, “e último dianan.”—2 Timoteo 3:1-5.

Tin berdadero speransa ku hende lo ta uní atrobe?

Beibel ta duna speransa ku tur hende na tera por ta uní atrobe. Beibel ta primintí ku tur hende na mundu lo ta uní bou di “e Reino di Dios,” un reino selestial.—Lukas 4:43; Mateo 6:10.

Hesukristu, e Rei di e Reino ei, lo sòru pa pas reina riba tera. Beibel ta bisa:

• “Hende hustu lo ta manera mata ku ta sprùit di nobo, i lo tin pas tur kaminda.”—Salmo 72:7.

• “Lo e libra hende pober ku ta sklama pa yudansa. . . . Lo e libra nan for di opreshon i violensia.”—Salmo 72:12, 14.

Den nos tempu, Hesus su siñansanan ya kaba a uni miónes di hende den 239 pais. Nan a siña pa stòp di odia otro hende. Pa haña sa mas tokante esaki, lesa e seri di artíkulo ku tin e título: “Nos Por Vense Odio.”