Di Bèrdat e Weganan Olímpiko Por Uni Hende?—⁠Kiko Beibel Ta Bisa?

Hende ta ferwagt ku mas o ménos 5 mil mion hende lo wak e Weganan Olímpiko di Zomer 2024. Atleta di 206 pais lo partisipá den e weganan ei. Thomas Bach, presidente di Komité Olímpiko Internashonal, a bisa: “Nos ta forma parti di un evento ku ta trese pas i union na mundu. Laga nos apoyá e meta di e Weganan Olímpiko, esta, pa tur hende biba na pas i uní ku otro, apesar ku nos tur ta diferente for di otro.”

Di bèrdat e Weganan Olímpiko por trese pas i union na mundu? Lo yega e dia ku nos lo tin berdadero pas i union?

E Weganan Olímpiko por trese pas i union?

Durante e Weganan Olímpiko di e aña akí, hende no a pensa riba deporte so. E weganan akí a pone hende papia tokante problema polítiko i sosial ku ta kousa divishon entre hende, entre otro, derecho humano, rasismo, diskriminashon religioso i desigualdat entre hende hòmber i hende muhé.

Hende ta disfrutá di e Weganan Olímpiko i otro evento deportivo internashonal. Sinembargo, na lugá di trese berdadero pas i union, e eventonan akí ta promové aktitut i komportashon di hende ku ta kousa desunion. Sí, e eventonan akí ta mustra kon dividí mundu ta realmente.

Beibel a profetisá kon aktitut di hende lo ta den nos tempu. E aktitutnan ei ta pone ku ta bira masha difísil pa uni hende. (2 Timoteo 3:1-5) Pa haña sa mas tokante e profesia ei, lesa e artíkulo “Beibel A Bisa Kon Hende Lo Pensa i Aktua den Nos Tempu?”

Berdadero pas i union ta posibel?

Beibel ta sigurá nos ku un dia lo tin pas i union na mundu. Beibel ta primintí ku tur hende na mundu lo ta uní bou di un gobièrnu den shelu ku yama “e Reino di Dios.”—Lukas 4:43; Mateo 6:10.

Hesukristu, Rei di e Reino ei, lo trese pas rònt mundu. Beibel ta bisa:

“Hende hustu lo ta manera mata ku ta sprùit di nobo, i lo tin pas tur kaminda.”—Salmo 72:7.
“Lo e libra hende pober ku ta sklama pa yudansa . . . Lo e libra nan for di opreshon i violensia.”—Salmo 72:12, 14.

For di awor, e siñansanan di Hesus a uni miónes di hende di 239 pais. Komo kristian, Testigunan di Yehova rònt mundu a siña kon pa ta na pas ku otro hende. Pa haña sa kon esei ta posibel, lesa e edishon di E Toren di Vigilansia ku e tema: “Nos Por Vense Odio!”