Hesus Lo Pone un Fin na Kriminalidat

Hesus ta komprondé loke hende ta sinti ora nan ta sufri pa motibu di krímen òf inhustisia. Hesus a ser akusá falsamente, batí, husgá i kondená inhustamente i ehekutá na un manera kruel. Aunke Hesus tabata inosente, e tabata dispuesto pa sakrifiká “su bida komo reskate a kambio di hopi hende.” (Mateo 20:28, nota; Huan 15:13) Awor, komo Rei di e Reino di Dios, pronto lo e sòru pa hustisia reina riba henter tera. Lo e kaba ku kriminalidat pa semper.—Isaías 42:3.

Beibel ta deskribí kon mundu lo ta despues ku Hesus kaba ku krímen i inhustisia:

• “Lo no tin hende malbado mas. Lo bo bai wak kaminda nan tabata, ma nan lo no t’ei. Pero hende mansu lo heredá tera, i nan lo disfrutá di pas na abundansia.”—Salmo 37:10, 11.

Kon nos por mustra ku nos ta gradisidu pa tur loke Hesus a hasi i lo bai hasi pa nos? Un manera ta di siña mas tokante “e bon notisia di e Reino di Dios,” esta, loke Hesus a prediká. (Lúkas 4:43) Lesa e artíkulo “Kiko e Reino di Dios Ta?”