Ta Dios Su Falta Ku Nos Ta Sufri?

E kontesta ku Beibel ta duna

Beibel ta kontestá bon kla ku nò! Sufrimentu nunka tabata parti di Yehova Dios su propósito pa humanidat. Loke a pasa ta ku nos promé mayornan a rebeldiá kontra Dios su gobernashon i a skohe pa nan mes disidí kiko ta bon i malu. Nan a bira lomba pa Dios i a sufri e konsekuensianan.

Awe nos ta eksperensiá e efektonan di nan mal desishon. Pues Dios di niun manera ta esun ku ta kousa sufrimentu.

P’esei Beibel ta bisa: “Ora un hende ta pasa den prueba, e no mester bisa: ‘Dios ta pone mi na prueba.’ Pasobra ningun hende no por pone Dios na prueba ku kos malu, i e mes tampoko no ta pone ningun hende na prueba ku kos malu.” (Santiago 1:13) Tur hende por haña nan ku sufrimentu, asta esnan ku tin Dios su aprobashon.