Dios Lo Yuda Mi si Mi Resa na Dje?

E kontesta ku Beibel ta duna

Sí, Dios ta yuda hende ku di kurason ta pidié pa kosnan ku ta na armonia ku su boluntat. Asta si bo no a yega di resa na Dios, e ehèmpelnan den Beibel di hende ku a resa pidi ‘Dios, yuda mi’ por animá bo pa hasi meskos. Wak algun ehèmpel:

• “Yuda mi, o SEÑOR mi Dios; salba mi segun bo miserikòrdia.”—Salmo 109:26, Beibel Santu.

• “Mi ta afligí i den nesesidat; pura bini serka mi, o Dios! Bo ta mi yudansa.”—Salmo 70:5, BS.

Sin duda, esun ku a skirbi e palabranan ei tabatin un fe firme den Dios. Ma Dios ta skucha tur hende ku resa na dje ku e aktitut korekto, manera hende ku tin “kurason kibrá” òf hende “abatí.”—Salmo 34:18, BS.

No pensa ku Dios ta asina leu for di bo ku e no ta interesá den bo problemanan. Beibel ta bisa: “Jehová ta den haltu, y E ta mira e umilde; y e orguyoso E ta conoce di leu.” (Salmo 138:6, Salmonan y Proverbionan, Editorial Evangelica) Anto, un biaha Hesus a bisa su disipelnan: “[Dios] a konta asta e drachinan di kabei riba boso kabes.” (Mateo 10:30) E sa detayenan di bo ku abo mes no ta konsiente di dje. Pues, bo no ta kere ku e lo skucha ora bo pidié yuda bo ku bo preokupashonnan?—1 Pedro 5:7.